Naalakkersuisoqarfimmi pisortaq: KNR unioqqutitsilluni ussassaarisimavoq
Nivi Olsenip naalakkersuisoqarfiani atorfilittat AG-mut oqaatigaat, nittartagaq KNR.gl "programminik aallakaatitsivittut" taaneqarsinnaanngimmat, KNR nittartakkamini KNR.gl-mi ussassaarinissamut inatsisitigut tunngavissaqanngitsoq.
Nivi Olsenip atorfilittai akerlianik KNR-p pisortaa Søren Lennert Mortensen AG-mut oqaatigaa KNR-p Inatsisartut inatsisaat naalakkersuisoqarfimmi atorfilittanit allaanerusumik paasigaa.
KNR-p siulersuisuisa siulittaasuata Nukâraq Eugeniusip tassunga isumaqataavoq AG-mullu imannak oqarluni:
Aamma atuaruk AG: KNR-ip aningaasat unioqqutitsisumik isertitani utertittariaqarpai
- Unammillernermik equtitsinermik oqalukkaangatta tamatigut nalorninartoqartarpoq. Tassami inatsimmi ersarissumik allassimanngilaq suut unammillernermik equtitsinerunersut, KNR-illu aammalu naalakkersuisoqarfiup qularnaarlugu oqaatigisinnaanngilaat killissaa sumiinnersoq, Nukâraq Eugenius AG-mut oqarpoq.
- Suulup KNR-llu inatsit qanoq nassuiarneraat ilannguffigissanngilarput, uagununa maanna nassuiaripput, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi pisortaq, Michael Kristensen oqarpoq.
AG ullumi saqqummermat Ilinniartitaanermut kultureqarnermut ilisimatusarnermut ilageeqarnermullu Naalakkersuisoq akissuteqartikkusussimagaluarparput, ilumut KNR-p nittartakkamini ussassaarutinik saqqummiinera inatsisinut unioqqutitsinerunersoq taamaalilluni unioqqutitsilluni aningaasanik isertitaqarsimanersoq.
Aamma atuaruk Knr.gl-imi pilerisaarutit peerneqarput
Naalakkersuisorlu nammineq akerusussimanngilaq, taamaalilluni naalakkersuisoqarfimmi pisortani Michael Kristensen akissuteqartippaa, suliaq allaffissornermut teknikkimullu tunngassuteqarnera peqqutigalugu.
Naalakkersuisoqarfimmilu pisortap Michael Kristensenip inatsit ima nassuiarpaa:
- KNR-kkut radiomi tv-milu programminik aallakaatitsivimmi iluanni ussassaarisinnaatitaapput, inatsimmi paragraf 2 takugussiuk programminik aallakaatitsiviit taaneqarsimapput tv radiolu, tassa "programminik aallakaatitsivittut". Taamaattumik KNR-mut nalunaarutigaarput nittartakkami imaluunniit nutaarsiassani siammarteriallani pragramminik aallakaatitsivittut taaneqarsimanngitsuni ussassaareqqusaanngitsoq, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi pisortaq, Michael Kristensen KNR-mut taama oqarpoq.
