Naalakkersuisoqarfimmi pisortamik atorfinitsitsineq Ombudsmandip misissuiffigeqqinnianngilaa
Aningaasaqarnermut Nunamullu Namminermut Naalakkersuisoqarfiup suliaq pineqartoq pillugu nalunaarusiaa tigoreerlugu, suliap misissuiffiginerata nanginnissaanut tunngavissaqarani, Inatsisartut Ombudsmandiata nittartagaani saqqummiunneqartumi Vera Lethip nalunaarutigaa. Namminermi paasinninni tunngavigalugu Naalakkersuisoqarfimmik isornartorsiuinissamut annerusumik tunngavissaqanngitsoq oqaatigaa.
Vittus Qujaukitsup Naalakkersuisoqarfiani, 44-nik ukiullip Carsten Frank Hansenip pisortatut atorfinitsinneqarnerminit ullut pingasuinnaat qaangiutiinnartut tunuartariaqalernera taamani maluginiarneqarluarpoq, tamatumunnga patsisaalluni Danmarkimi suliffigisimasaminit marlunnit aningaasanik peqquserluuteqarsimasutut unnerluutigineqarluni soraarsitaasimanera paasineqareersorlu.
Carsten Frank Hansenip unnerluutigineqarnerminut tunngasut Namminersorlutik Oqartussanut paasissutissiissutigisimanngilai, tassami pinngitsuutitaanissani qularutiginnginnamiuk. Unnerluutiginnissummi Odensemi eqqartuussivimmi qaammatip ataatsip matuma siornagut suliarineqarmat, taanna aamma pinngitsuutitaareerpoq.
Naalakkersuisoqarfimmut pisortanngortup atorfimmut naleqquttumik ataqqinassuseqartumik tatiginassuseqartumillu pissusilersornissamik piumasaqaammik ilumut malinnissimanera paasiniarlugu Inatsisartut Ombudsmandiat siorna septembarip 30-anni misissuiniarluni aalajangerpoq.
Carsten Frank Hansenip sooq atorfinitsinneqarsimanera Ombudsmandip ilanngullugu paaserusuppaa, tassami atorfimmut qinnuteqartut arlallit qaffasinnerusumik ilinniagaqarmata pisortanilu atorfilittut sulinermik misilittagaqarluarlutik.
Atorfinitsitsinermut tunngasut pappiaqqat tamaasa misissoreerlugit, Ombudsmandip misissuinerminik ingerlatitseqqinnissani tunngavissaqanngitsutut nalilerpaa.
Taassuma maluginiarpaa, Naalakkersuisoqarfimmi atorfinitsitsisartut qinnuteqartup siusinnerusukkut sulisitsisorisimasai arfinillit tusarniaavigisimagaat, matumanili Carsten Frank Hansenip aningaaserivimmi sulisitsisorisimasaa kingulleq, politiinut unnerluutiginnittuusimasoq ajoraluartumik tusarniaavigineqarsimanani. Tamannali Naalakkersuisoqarfimmit suliffeqarfimmilluunniit atorfinitsitsisartuusumit piaaraluni iliuuserineqanngitsoq oqaatigineqarluni.
Naalakkersuisoqarfiup allanik ilinniarluarsimanerusunik misilittagaqarnerusunillu atorfinitsitsinani Carsten Frank Hansenip atorfinitsinneqarnissaanut tunngavilersuutai, Ombudsmandip aamma akuersaarpai.
