Jørn Skov Nielsen suliffeqarnermut inuussutissarsiornermullu naalakkersuisoqarfiit ataatsimoorallarneranni 2011-mili pisortaavoq. Toqqorsivimmit assi.

Naalakkersuisoqarfimmi pisortaasimasoq Greenland Mineralsimi pisortatut atorfinittoq

Jørn Skov Nielsenip Kalaallit Nunaanni aatsitassarsiornermi suliat annersaata akuerineqarnissaa suleqataaffigilerpaa.

Jørn Skov Nielsen Namminersornerullutik Oqartussani kingornalu Namminersorlutik Oqartussani pisortatut atorfiit assigiinngitsut ukiorpassuarni suliffigai, naalakkersuisoqarfimmili pisortaasimasoq maanna isumaqatigiinniartarnermi inissisimaffigisartakkaminit illuatungaanut nuuppoq, tassa aatsitassarsiutileqatigiiffimmi Greenland Mineralsimi (GML) pisortatut atorfinikkami.

GML tusagassiorfinnut nalunaaruteqarluni taama allappoq.

Aatsitsassarsiutileqatigiiffiup kujataani Narsap eqqaani Kuannersuarni suliniutai Jørn Skov Nielsenip Nuummi suliarisassavai.

- Suliniut immikkuullarissoq nunarsuarmi aatsitassarsioqatigiiffinni aatsitassanik qaqutigoortunik piaanermi siuttunngoratarsinnaavoq, Jørn Skov Nielsen oqarpoq.

Aatsitassanut tunngasunik suliaqarnermik misilittagaqarluartoq

Jørn Skov Nielsen aatsitassanut naalakkersuisoqarfiusimasumi immikkoortortaqarfinni assigiinngitsuni 2002-miit 2011-mut pisortaavoq.

Suliffeqarnermut inuussutissarsiornermullu naalakkersuisoqarfiit ataatsimoorallarneranni tamatuma kingorna pisortanngorpoq.

AAMMA ATUARUK Greenland Minerals arlalinnik avatangiisinut sunniutaasinnaasunut tunngasunik suli iluarsisassaqartoq

Aatsitassanut immikkoortortaqarfik 2015-imi immikkut naalakkersuisoqarfeqaleraluartoq Jørn Skov Nielsenip aatsitassarsiorfiit inuiaqaatigiinnut sunniutigisinnaasaannut tunngasortaa akisussaaffigiinnarpai.

Misilittagaqarluartumik qaffasissumik atorfeqarsimasumik Greenland Minerals atorfinititsivoq aatsitassarsiutileqatigiiffiullu isertuutinngilaa pingaarutilimmik atorfinititsisimallutik.

- Inummik suliamut taama naleqqutsigisumik pissarsisinnaaaneq qaqutigoortuuvoq, iluatsittumik inernilimmik angusaqarluarsinnaasunik, Greenland Mineralsip pisortaa John Meier oqarpoq.

Greenland Minerals Kuannersuarni Narsap eqqaani aatsitassanik suliniummut misissueqqaarnissamut 2011-mi akuersissummik tunineqarpoq.

Aatsitassarsiutileqatigiiffik inuiaqatigiinnut sunniutigisinnaasai avataangiisinullu kingunerisinnaasai akueritinniarlugit taamanili suliniuteqarpoq.

AAMMA ATUARUK Rapport om sociale konsekvenser er nu klar til godkendelse

Inuiaqatigiinnut kingunerisinnaasai siorna akuerineqarput, Kunnersuarnili aatsitassanut suliniummi avatangiisinut sunniutigisinnaasaannut akuersissut Greenland Mineralsip amigaatigaa.

Aatsitassanik piiaanissap akuerineqarluni aallartinneqarnissaanut amigaatigineqartunut ilaavoq pisortatigoortumik tusarniaaneq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat