Naalakkersuisoqarfik: Trumpimi atorfiliusimasup suleqataanit attavigineqartoq
Kangerlussuarmi qarasaasianut paasissutissaasivissuaq, nunatsinni suleqataasoq Tasersiamilu Tarsartuullu Tasersuani erngup nukinganik nukissiorfiliornissamut neqerooruteqarsinnaaneq.
Tamakku tamarmik Drew Hornip pilersaarutigigai KNR-ip sapaatip-akunnerata matuma aallartinnerani oqaluttuaraa.
Taanna Trumpip præsidentiuffiata siulliup nalaani Trumpip aqutsisoqarfiani atorfeqarsimavoq. Aningaasaliinermik ingerlatsivimmi GreenMet-imi manna pisortaavoq.
Tassunga atatillugu Inuussutissarsiornermut, Aatsitassanut, Nukissiuuteqarnermut, Inatsisinik atortitsinermut Naligiissitaanermullu Naalakkersuisoqarfiup Drew Hornip oqaasii ilumuunnginnerarpai.
Pilersaarutaasa suuneri kikkullu suleqatigisinnaanerai ilisimanngilaat.
Naalakkersuisoqarfilli oqaluttuaq saqqummiunneqarmat sukumiinerusumik misissuivoq.
Paasissutissanillu nutaanik nassaarsimapput.
Kalaallit suleqataasup kinaanera ilisimaneqanngitsoq
Erngup nukinganik nukissiorfiliornissamut neqerooruteqarnissaq maanna piareersarneqartoq, naalakkersuisoqarfiup nalunaarutigaa.
Suliffeqarfiit imermik atuisinnaatitaanermut tassuuna qinnuteqarsinnaassapput.
Suliniummut soqutiginnissinnaasut siorna aasaanerani ukiassallu aallartinnerani tassunga atatillugu oqaloqatigineqarput.
Naalakkersuisoqarfiup siusinnerusukkut oqaatigisimasaatut, Drew Horn imaluunniit suliffeqarfiutaanit GreenMet-imit sinniisut oqaloqatigineqarsimanngillat.
Kalaallilli suliffeqarfiutaat, naalakkersuisoqarfimmit oqaloqatigineqartut ilaat, Amerikamiumut attaveqartoq maanna paasinarsivoq.
- Naalakkersuisulli ingerlatseqatigiiffik Drew Hornip Kalaallit Nunaanni maanna suleqatigisaanik taaneqartoq maajimi 2025-mi ataatsimeeqatigaa, naalakkersuisoqarfik allappoq.
Suleqataatalu kalaallip saaffiginninnerata kingorna ataatsimiissimallutik, aamma ilisimatitsissutigaat:
- Kalaallit Nunaanni suleqataasup neqeroortitsinermut soqutiginninnerminik saqqummiussinera ataatsimiinnermi pingaarnertut sammineqarpoq, naalakkersuisoqarfik allappoq.
KNR kalaallip suleqataasup kinaanera pillugu paasitinneqanngilaq.
Tamanna naalakkersuisoqarfiup kikkut oqaloqatigisimanerinik oqaatiginnissinnaannginneranik peqquteqarpoq:
- Suliffeqarfiit sorliit neqeroorummik soqutiginninnersut saqqummiunneqaraluarpat, suliffeqarfiit niuernikkut soqutigisaat ajoquserneqarsinnaanerannik kinguneqarsinnaammat, naalakkersuisoqarfik allappoq.
Suli aalajangiisoqanngitsoq
Naalakkersuisup naalakkersuisoqarfiulluunniit aallarniutaasumik oqaloqatigiinnerni ataatsimeeqateqartarnerat eqqumiiginartuunanilu eqqarsarnartortaqanngilaq.
Aammattaaq naalakkersuisoqarfik KNR-imut allappoq, Amerikamiut suliffeqarfiutaat erngup nukinganik nukissiorfiliornissamut neqerooruteqarnissaminut tikilluaqqusaasoq.
- GreenMet suliniummut erngullu nukinganik nukissiorfinnut piginneqataanissaminut, neqerooruteqartut allat naligalugit aamma naapertuilluartumik unammillerluni neqerooruteqarsinnaatitaavoq, naalakkersuisoqarfik allappoq.
- Neqerooruteqartut tamarmik naalakkersuisut najoqqutassiaat tunngavigalugit nalilersuiffigineqassapput.
Erngup nukinganik nukissiorfiliornissamik suliniutip sumut atorneqarnissaanut tunngatillugu periarfissat arlaliusut, Inuussutissarsiornermut, Aatsitassanut, Nukissiuuteqarnermut, Inatsisinik atortitsinermut Naligiissitaanermullu Naalakkersuisup Naaja Nathanielsenip (IA) KNR-imut januaarimi oqaluttuaraa.
Qarasaasianut paasissutissaasiviit saniatigut aluminiumik aatsitsivik imaluunniit innaallagissiorfik aamma periarfissaasinnaapput.
Drew Horn CNBC-mit apersorneqarluni Kangerlussuarmi qarasaasianut paasissutissaasiviup aappaagu killilimmik ingerlanneqarsinnaalernissaa naatsorsuutigilereernerarmagu, nutaarsiassaq taassuma pilersaarutaanut tunngasoq kingulleq allaaserineqarpoq.
Naalakkersuisoqarfiulli pilersaarutit pillugit ilisimatinneqarsimannginnerarnertik attappaat.
Neqerooruteqartut nalilersuiffigineqarnissaannut najoqqutassiat maanna suliaralugit, naalakkersuisoqarfiup nalunaarutigaa.
- Taamaattumik tamanna sioqqullugu aalajangiisoqanngilaq sumiiffimmullu tunngasunik akuersissuteqarsimanngilaq, aamma GreenMetip pilersaarutigineragai pillugit ilisimatinneqanngilagut, naalakkersuisoqarfik allappoq.
