Naalakkersuisoqarfiit millionikkaanut isumasioqatigiissitsisarlutillu angalasarput: Qaffariangaatsiarsimapput
Nunatsinni naalakkersuisoqarfinni angalanerit, isumasioqatigiinnerit, workshopertitsinerit ataatsimiinnerillu eqqarsaatigigaanni aatsaat taama ulapputsigisoqarpoq.
Tamanna Demokraatit sinnerlugit Inatsisartunut ilaasortap, Anna Wangenheimip aningaasaqarnermut naligiissitaanermullu naalakkersuisumut, Naaja H. Nathanielsenimut (IA) paragraf 37-mik apeqquteqarneranut akissutini arlalinni takuneqarsinnaavoq.
KNR-ip kisitsisit misissorluarpai.
Isumasioqatigiinnerit, workshopit, ataatsimiinnerillu millionit nalinganut
Naalakkersuisoqarfiit isumasioqatigiinnernut, workshopinut, ataatsimiinnernullu aningaasartuutaat aningaasartuutit pillugit quppernernik arfineq-marlunnik akissummi uissuumminarnerpaasut, Anna Wangenheim oqarpoq.
Naalakkersuisoqarfinniimmi aqqaneq-marlunnit qulini aningaasartuutit 2019-imit 2022-mut qaffariangaatsiarsimasut taakkunani atuarneqarsinnaavoq.
Assersuutigalugu Isumaginninnermut, Suliffeqarnermut Nunamullu Imminermut Naalakkersuisoqarfiup isumasioqatigiinnernut aningaasartuutai 2019-imi 0 koruuniusut 2022-mi millionit aappaata affaat atorneqarsimapput.
Nunanut allanut tunngasunut, Inuussutissaqarnermut, Niuernermullu Naalakkersuisoqarfik ingasaassinnginneruvoq, tassani aningaasartuutit 2019-imi 51.000 koruuniusut 2022-mi 597.000 koruuniupput. Tassa aqqanileriaammik amerlisimapput.
Angalanermut aningaasartuutit annertusingaatsiartut
Matumani naalakkersuisoqarfiit 2022-mi angalanernut 2019-imit annertunerusunik aningaasartuuteqarsimasut kisitsisit takutippaat.
- Angalanermut aningaasartuutit qinigaaffinnut siusinnerusunut sanilliullugit annertunerungaatsialerput. Ineriartorneq tamanna ukkatarisariaqaripput isumaqarpunga, akileraartartummi aningaasaataat taakkununnga atorneqartarput, Anna Wangenheim (D) oqarpoq.
Naalakkersuisoqarfiit angalanernit isumasioqatigiinnernillu qanoq pissarsiaqarnissartik naatsorsuutigissaneraat pillugu ammanerusariaqartut taanna isumaqarpoq.
KNR-ip naalakkersuisoqarfiit marluk qulaani eqqaaneqartut aningaasat qanorpiaq atorneqarsimanersut soorlu aningaasartuutit taama qaffatsiginersut paasiniarlugu attaveqarfiginiarsarigaluarpai. Taakkuli ilanngutassiap saqqummersinneqannginnerani uterfigeqqinngilaatigut.
Sanilliukkuminaatsut
Naalakkersuisoqarfiit angalanermut aningaasartuutaat misissorluaraanni Aatsitassanut Inatsiseqarnermullu Naalakkersuisoqarfik maluginiagassaanerpaavoq.
Taakku 2019-imi 1 millionit tikinngilaarlugit angalasimasut allassimavoq. 2022-mili kisitsit taanna pingasoriaatinngorsimapput.
Kisitsisilli nangaanartoqartut, aningaasaqarnermut naligiissitaanermullu naalakkersuisoq, Naaja H. Nathanielsen (IA) oqarpoq.
Taassuma oqarnera naapertorlugu coronap aaqqissuussinerit kinguartissimavai, taamaalilluni 2022-mi aningaasartuutit qaffasinnerullutik. Naalakkersuisoqarfiit assigiinngitsut 'angalanermut aningaasartuutit' assigiinngitsumik nassuiaasertarpaat.
Aatsitassaqarnermut naalakkersuisoqarfiup pisortaata, Jørgen T. Hammeken-Holmip tamanna aamma eqqaavaa.
Taassuma oqarnera naapertorlugu taassuma naalakkersuisoqarfiani ujarassiuut suliaqarnerat qulimiguulimmillu attartornerit angalanermi aningaasartuutinut aamma ilaapput.
Iipilit pærellu
Naalakkersuisoqarfiilli aningaasartuutitit piumasaqaatit assigiit malillugit naatsorsortanngikkunikkit qanoq sanilliussisoqarsinnaava?
Sanilliussisoqarsinnaanngitsoq, Anna Wangenheim nassuiaavoq. Tamannalu aningaasaqarnermik aqutsiuminaatsitsivoq:
- Sanilliussinissamut tunngavissaqarniaraanni namminersorlutik oqartussat misissuinissaat pingaaruteqarpoq. Taamaalilluta aningaasat siunertamut atorneqarnissaat qulakkeersinnaavarput, taanna oqarpoq.
Aningaasaqarnermut naalakkersuisoq, Naaja H. Nathanielsen isumaqataavoq:
- Assigiissaartumik uuttortaasinnaanissamut pitsaanerulernissarput inerniliissutaavoq. Inatsiartut taamaalillutik pituttorsimanerussallutik.
Taamaakkaluartorli politikkikkut aaqqissuussinermi aningaasaqarnermut atatillugu sukaterisoqartariaqartoq, Anna Wangenheim (D) isumaqarpoq.
- Politikkip tungaaniit isigalugu maanna naalakkersuisuusut angalanermut aningaasartuutinut ataatsimiinnernullu atatillugu aningaasanik paarsinerlunnerusut isumaqarpunga.
