Naalakkersuisoqarfiit Hans Enoksen-ip tiguai

Jens Napaattuup naalakkersuisuuffigisimasai, ineqarnermut attaveqarnermullu avatangiisinullu naalakkersuisoqarfik naalakkersuisut siulittasuata Hans Enoksen-ip ukiaru inatsisartut ataatsimiinnissaata tungaanut maannamiit ingerlatilissavai. Naalakkersuisut ullumi taama aalajangernerat pillugu Hans Enoksen ima oqarpoq.

- Imatut aaqqippara, Jens Napaattuup naalakkersuisoqarfigisimasaa tamarmi allanngortinneqarani uanga naalakkersuisuuffimma ataanut inissinneqarallassasoq Inatsisartut ukiakkut ataatsimiinnissaata tungaanut.

Jens Napaattuup naalakkersuisoqarfigisimasaata aggulunneqannginnissaa pingaartillugu taama aalajngerluni Hasn Enoksen oqarpoq.

-Sulisut eqqarsaatigalugit naalakkersuisoqarfiup allanngortinneqarani ingerlaannarnissaa pingaartipparput, minnerunngitsumik suliassat angallannermut tunngasut ukiaru saqqummiunneqartussat naammassillugit suliarineqarnissaat kissaatigaarput.

- Kisianni soorunami uani piffissaq atugassarput uannut ilungersunarsilaassangaluartoq kisianni neriuppunga pitsaasumik ikioqatigiilluariarutta naammassineqassasut.

Inatsisartut ukiaru ataatsimiilerpata naalkkersuisoqarfiup qanoq pineqarnissaa aalajangiiffigineqassasoq Enoksen oqarpoq.

- Naalakkersuisooqatigiit iluanni eqqartussavarput qularineqassanngilarlu aaqqiisoqarnissaa pillugu uanga naalakkersuisut siulittasuattut aamma siunnersuuteqarnissara.

Nutaamik naalakkersuisortaarnissaa maannakkut oqaatigisinnaannginnerarpaa.

Hans Enoksen-ip naalakkersuisutut ullumikkumiit oqartussaaffigilerpai, namminersornermut, aatsitassanut, avatangiisinut, allaffissornermut, attaveqarnermut ineqarnermullu pisortaqarfiit.