Naalakkersuisoq: Urani pillugu allannguinissamut tunngavissaqanngilagut

Innuttaasut isumaat kiisalu ilisimasat paasisallu nutaat tunngavigalugit Naalakkersuisut siunissami uranimik akulinnik aatsitassarsiorsinnaaneq aalajangiivigissavaat.
Allattoq Oline I. Olsen
septembarip 03-at 2009 14:43

- Uranimik akoqanngitsumik aatsitassarsiornissamut isumatta allanngortinnissaanut ullumikkut tunngavissaqanngilagut, Naalakersuisunut ilaasortaq Ove Karl Berthelsen oqarpoq. Taanna Narsami urani pillugu oqallinnermi peqataaqqammerpoq.

- Ullumikkut ilisimasakka aallaavigalugit Uranimik suli suleriaaseq allanngorsimanngilaq 1988-imi aaliangernermut oqassallunga aaliangerneq allanngortariaqartoq.

Naalakkersuisunut ilaasortaq Ove Karl Berthelsen Narsami urani pillugu oqallinermi peqataaqqammerpoq. Innuttaasut aatsitassat uranimik akullit kiisalu uranimik akoqanngitsut pillugit isumaat tusarniassallugit peqataavoq. Inatsisip 1988-imiillu atuuttup allanngortinneqarnissaanut Naalakkersuisut suli piareersimanngitsut Ove Karl Berthelsen erseqqissaavoq.

- Tassa Naalakkersuisuninngaaniit pilersaaruteqanngilagut ilisimasaqassutsikkut nalunngisaqassutsikkullu imatut suli siuarsimatiginngilagut inatsisissamik allannguutissamik piareersimanata, Ove Karl Berthelsen oqarpoq.

Naalakkersuisoqatigiit uranimik akoqanngitsumik aatsitassarsiortoqarnissaanik politikkiat allanngortinniarneqassappat, taava paasisat ilisimasallu nutaat nalilersorneqaqqaassasut, Ove Karl Berthelsen oqarpoq. Uranimullu tunngatillugu inuttaasut isumaat 1980-ikkunniit allanngorsimanersoq Ove Karl Berthelsenip tusarniarusuppaa.

- Tassa soorunami 1988-iminngaaniit teknikkikkut ineriartornerit aammalu aatsitassanik piiariaatsit avatangiisinut sillimaniarnermik ineriartorfiusimapput. Taakkulu aamma aallaavigalugit 1988-imiilli matoqatsitsinerput aallaavigalugu innuttaasut isumaat qanoq ingerlariaqqissimanersoq tusartariaqaratsigu innuttaasut peqatigalugit oqallinnissaq piffissanngorsoraarput.

Tassa imatut paasissavarput ilissi Uranimut politikkersi allanngortinnialerissi?

- Taanna Naalakkersuisunit pilersaarutigineqanngilaq, aamma Naalakkersuisunit isummerfigineqanngilaq, kisiannili Inatsisartut taanna oqartussaaffigivaat, kingullermik 2008-mi aamma aaliangerpaat innuttaasut oqallinnermi ilanngunneqassasut, Ove Karl Berthelsen taama oqarpoq.