Naalakkersuisoq: Tupamik imigassamillu atuinikinnerulerneq qutsatigiinnassavarput

Tupamik imigassamillu atuinerup millisimanera qutsatigiinnassavarput, Per Berthelsen oqarpoq.

- Pingaarnersiuilluni tulleriiaakkanik allanngortiterinikkut allatigullu taakkua amigaataalersussat naniniarneqassapput. Qujasariaqarpugullu Nunatta Karsia ullumikkut peqqissumik inissisimammat. Tigoriaannarnik ikigisissaanngitsunik uninngatitaqarpugut. Namminersornerullutik Oqartussat nammineerlutik taarsigassarsiaqanngillat, taamaattumillu nanertuuteqaratik Per Berthelsen oqarpoq.

Akitsuutitigut isertitat missingersuutinit ikinnerugaluartut, aningaasaqarnermut naalakkersuisoq Per Berthelsen isumaqarpoq, allatigut nuannaarutissaqartugut.

- Peqqinnanngitsut akitsuuserneqarsimasut atorneqarnerisa apparnerat siunissamut aningaasaliissutitut nalilertariaqarparput. Tassami takusinnaasavut naapertorlugit aalakoornartumik minnerunngitsumillu tupamik atuineq appariartortoq. Tamanna siunissami ungasinnerulaartumi inunnik isumaginninnerup peqqinnissaqarfiullu iluini aningaasamik sipaarnermik kinguneqassaaq, aningaasaqarnermut naalakkersuisoq Per Berthelsen oqarpoq.