Naalakkersuisoq: Telemedicin atorneqaqqittariaqalerpoq

Telemedicip, tassalu attaveqaatit atorlugit nakorsiartitsinerup nunatsinni sipaarniuteqarfigineqartup atorneqaqqilernissaanut piffissanngortoq, Peqqissutsimut Naalakkersuisup Asii Chemnitz Narupip, nunat EU-mut ilaasortat attaveqaatit atorlugit nakorsiartitsisarneq pillugu Norgemi Tromsø-mi maajip naalernerani ataatsimeersuarneranni saqqummiuppaa.

- Ukiuni siuliini ajunngitsumik atuisimavugut aamma napparsimmavinni atortorissaarutit tunngaviusumik pigineqareerput, ingerlariaqqittariaqarpugulli. Asii Chemnitz Narup oqarpoq.

Nakorsianut pitsaanerusumik kiffartuussinissaq anguniarlugu telemedicinimik atuinerup annertusarneqarnissaa naalakkersuisut anguniarniarpaat.

- Assigiinngitsunik peqquteqarluni ukiut siuliini ineriartortitsineq kigaallatsinneqarsimavoq, maannali killiffitsinninngaannit nangeqqinniarparput. Tamannalu pillugu atorfilittat ukiamut piareertussamik pilersaarusioqqullugit qinnuigaakka. Asii Chemnitz Narup oqarpoq.

Kigaallatsitsisimanerulli kingunerisinnaasaanik naalakkersuisoq taasaqarsinnaannginnerarpoq, sulisunilli pikkorissartitsiniarneq kigaappallaarsimanerarlugu. Sulisulli maanna pikkorissartinniarnissaat suliniutigineqassasoq erseqqissaatigalugu.

- Nakorsiaraangatta paasissutissat allattorneqartarput, taakku qarasaasiakkut paarineqalissapput, qinnguartaanerit mutinngorsarneqassapput assit email-ikkut nassiunneqarsinnaanngorlugit. 2007-mit nuna tamakkerlugu taamaaliorsinnaanngussaagut. Naalakkersuisoq nassuiaavoq, nangipporlu:

- Inuit sulunnersut sukkanerusumik paasiniarneqarsinnaanngussaaq, taamaalilluni kiffartuussineq sullissinerlu pitsanngoriaateqassalluni.