Naalakkersuisoq Tasiilami innuttaasunik ataatsimiititsisoq

Innuttaasunik ataatsimiititsinermi inuit 40-t sinnerlugit soqutiginnillutik peqataapput. Naalakkersuisoqarfik tusagassiorfinnut nalunaartueqarluni taama ilisimatitsivoq.

Suliassaqarfinnik Nakkutilliisut Tasiilami Isumaginnittoqarfik pillugu nalunaarusiamik saqqummersitseqqammernerat Tasiilamut tikeraarnermut tunuliaqutaavoq:

- Nakkutilliinermut nalunaarusiaq tigoqqammerpara, taassumunngalu atatillugu pingaartippara Tasiilami innuttaasut oqaloqatigissallugit, taamaasillunga ulluinnarni atugarisaannik tusarfigalugit, Martha Lund Olsen taama oqarpoq.

Akunnerit marluk ingerlaneranni apeqqutit 40-t tungaannut saqqummiunneqarmata innuttaasunit soqutiginnilluarneq ersersinneqarpoq. Taamaasillutik qulequtaritinneqartut ”Meeqqanut 2016-mi suliniutit”, siusinaartumik pensionisiat, isumaginninnerup aqunneqarneranut aaqqissuusaaneranullu inatsisitaaq kisiisa eqqartornagit, najugarisami atugarisat aamma sammineqarput.

Innuttaasunik sullissineq pitsaanerulertariaqartoq

Atukkat pillugit pisortanut attaveqarniarnerit, sumut saaffiginniffissaaruttarnerit pisortanullu saaffiginnissutit akissutissaaruttarneri, pitsanngorsaavigineqarnissaat innuttaasunit ujartorneqarpoq.  

Allat inuunermi atugarisanut tunngasut aamma sammineqarput; meeqqat atugarisaat, meeqqanik inissiisarnerit, angajoqqaarsiaasarneq, katsorsartittarnerit, inuuniarnermilu aningaasartuutit illumut, kiassarnermut minnerunngitsumillu nerisassat akiinut naliginnarmik malinnaaniarneq.  

Ilanngullugu inunnik isumaginninnermi sulisussaaleqinermi najukkami ilinniaqqissinnaanermut periarfissaasut angutinit soqutigineqarput.

Ernumanartunik oqallittoqaraluartoq, eqqissisimasumik uummaarissumillu ataatsimiinneq ingerlavoq. Naggataasumillu neriulluarnartortalimmik Tasiilarmiumit oqaasertaliisoqarmat;  ”Tasiilaq sapinngilaq” - ataatsimiigiaqataasunit ersaattaannermik innuttaasunik ataatitsimiinneq naammassineqarpoq.