Naalakkersuisoq: Taamaammat killilersuisoqarnerunngilaq
Nuummi inuit sisamat covid 19-imik tunillanneqarsimasut ataasinngormat unnukkut paasineqaraluartoq, Naalakkersuisut Nuummiit aallaqqusinngikkallarnerup Nuummullu tikeqqusinngikkallarnerup saniatigut allamik killilersuuteqanngillat.
Tamannalu tunillanneqartut paasilertorneqarnerannik taavalu Nuummi inuit amerlasut akiuussutissalersorasuarneqarsinamerannik peqquteqartoq, peqqissutsimut naalakkersuisoq Kirsten L. Fencker (N) KNR-imut marlunngornermi oqarpoq.
- Massakkut tunillanneqarsimasut nassaarineqarnerat siusippoq, tunillaassuuttoqaratarsinnaaneranullu periarfissakitsutut tamanna nalilertariaqarpoq, Kirsten L. Fencker oqarpoq.
AAMMA ATUARUK Nuuk sapaatip akunnerani mattunneqartoq
Nuummi tunillatsissimasunik nutaanik maajip naanerani nassaartoqarpoq – taakkunannga sisamat sumi tunillatsissimanersut ilisimaneqarani.
Taamaalermat nunarput tamakkerlugu innuttaasunut akiuussutissanik kapuuinissamut pilersaarut allanngortinneqarpoq, Nuummi akiuussutissalersuinissaq siuartillugu. Taamaalillunilu Nuummi juunip aallaqqaataaniit 50-inniit qummut ukiulinnik akiuussutissalersuisoqalerpoq.
- Ullut 14-t matuma siona Nuummi matusisoqarneraniit Nuummi akiuussutissamik kapoorisoqangaatsiarsimavoq, taamaattumik pissutsit sapaatip akunnerata pingasut marlullu matuma siornaniit sanilliullugu allaanerujussuupput, Peqqissutsimut naalakkersuisoq Kirsten L. Fencker oqarpoq.
Nuummi Ilulissanilu tunillatsissimasunik ippassaq marlunngornermi paasisaqartoqarnerata kingorna nutaanik siumuisoqanngilaq.
Mittarfimmi immikkut mattusimatitsineq sivitsorneqartoq
Tunillaassortunik nappaalanersuaqarneranut ataatsimiititaliarsuup illoqarfimmit aallartoqarsinnaajunnaartitsinermi saniatigut mittarfimmi sanaartorfiup eqqaani covid-19-imik suli tunillaassuuttoqartutut oqartussat naliliinerat pissutigalugu immikkut mattusimatitsineq aamma sivitsorneqarpaa.
Immikkut mattusimatitsisoqarneratigut sanaartorneq tamarmi mattusimatinneqarpoq. Mittarfimmi sanaartornermik suliaqartut nioqqutissanik pisariaqartitaminnik pajunneqartassapput. Inuit nioqqutissanik pajuttut qanermut kiinnamulluunniit assiaquteqarnissaat piumasaqaataavoq, taakkulu allanut 2 meterinit ungasitsigisassallutik.
Tamatuma saniatigut immikkut mattusimatitsivimmiittut suli ikiorneqarsinnaallutillu coronamut misissortissinnaapput.
