- Uanga arlaannaatigulluunniit sioorasaarinikuunngilanga, naalakkersuisoq Jens Immanuelsen oqarpoq.Assi: KNR / Malik Brøns

Naalakkersuisoq: Sioorasaaruteqanngilanga

Jens Immanuelsenip Aalisarnermut Piniarnermullu ataatsimiititaliamut sioorasaarineqarnerarnini itigartitsissutigaa. Uppernarsaatissaqanngitsut, taanna oqarpoq.

- Uanga arlaannaatigulluunniit sioorasaarinikuunngilanga.

Aalisarnermut naalakkersuisoq, Jens Immanuelsen (S) oqarpoq.

Eqqumiikajaartumik nalunaarutaarpalussinnaavoq, pisorli una Inatsisartuni pingasunngornermi unnukkut oqallittoqangaatsiarnerani Jens Immanuelsenimit sioorasaaruteqartoqarsimasinnaaneranut tunngavoq.

Suliaq uunga tunngassuteqarpoq

Piniarnermut pisassanullu inatsisissatut siunnersuut Inatsisartuni pingasunngormat suliarineqartussaavoq.

Aalisarnermut Piniarnermullu ataatsimiititaliap siunnersuutip itigartinneqarnissaa aalajangereersimavaa.

Oqallittoqangaatsiarnerani ataatsimiititaliap ilaasortaasa naalakkersuisumut Jens Immanuelsenimut tatiginnikkunnaarnertik nalunaarutigaat.

Tatiginnikkunnaarnissamut taasisoqarnerani qulit naaggaarput. Arfineq-pingasut angerput ataaserlu taaseqataanani. Taamaammat Jens Immanuelsenip tatiginnikkunnaarnermik taasisoqarnera anigorpaa.

Inatsimmi nutaami Naalakkersuisut inatsisikkut uumasunut ajornartorsiutaasunut, soorlu nannunut, inunnut uumasuutinullu uilorianartorsiortitsisinnaasunut iliuseqarniarnermut atugassanik malittarisassiorsinnaangortussaagaluarput, taavalu inatsisaattuliorluni piniarnissamut nakkutiginninnermik sukaterisinnaalissallutik, inatsisattuliorlutillu piniartunut iliuuseqarsinaassallutik.

Inatsit unioqqutitsilluni piniarnermut nakkutilliinermut unioqqutitsilluni piniartunut kinguneritinneqartitsisarnernut aamma sukaterisussaavoq.

Piniarneq uumasunik ilisimasallit innersuussutai aallaavigalugit ingerlanneqartassasoq inatsimmut nutaamut aamma siunnersuutigineqarpoq. Piniartulli isumaat taamatulli pingaruteqartigissasoq Aalisarnermut, piniarnermut nunalerinermullu ataatsimiititaliaq isumaqarpoq.

Aalisarnermut ataatsimiititaliami ilaasortat, Hans Enoksen (PN) Aqqaluaq B. Egedelu (IA) oqaaseqartarfimmit naalakkersuisumut isornartorsiuingaatsiarput.

Taakku oqarnerat naapertorlugit Jens Immanuelsenip taakku piniarneq pisassallu pillugit ”malersorniarlugit" ataatsimiititaliap siulittaasuanut, Henrik Fleischerimut sioorasaarutigisimavaa. Tamanna ataatsimiititaliami marlunngonermi ataatsimiinnermi pisoq Aqqaluaq B. Egede oqarpoq.

AAMMA ATUARUK Partii Naleraq Jens Immanuelsenimut tatiginnikkunnaartoq

- Ataasiakkaarlugit taagussanngilakka, kisianni inatsisartut sulineranni, sulerisaatsit malillugiit ingerlatsinerput, aamma ataatsimiititaliap sulinerani taamatut pisoqariataarpoq. Imaannaanngitsorujussuuvoq, Aqqaluaq B. Egede KNR-imut oqarpoq.

Aalisarnermulli naalakkersuisup tamanna itigartippaa.

- Naamerluinnaq. Uanniinngilaq aamma. Uppernarsaatissaqanngilaq, Jens Immanuelsen oqarpoq.

Oqallinneq qullipiffiusoq

Inatsisartuni pingasunngornermi unnukkut pikkunartumik ilaatigullu qullilinartumik oqallittoqarnerani ataatsimiititaliap Jens Immanuelsen piniarnermut pisassanullu inatsimmik nutaamik suliaqarnermi pisussaaffimminik naammassinnissimannginnerarlugu isornartorsiorpaa.

Isumaliutissiissut Inatsisartut marlunngornermi oqallisigisassaanniilerpoq, tassanilu Hans Enoksenip Aqqaluaq B. Egedellu Jens Immanuelsen ilasseraanngilersimanerarpaat. Taassumami ataatsimiititaliap inatsisissatut siunnersuut itigartitsissutigineqartussanngortissimagaa oqallisigisassani takusinnaalerpaa.

- Siunnersorneqarnissamut aggersarneqarsimasunga isumaliutissiissutissami allaqqavoq. Aappassaani aamma saqqummiunneqartumi. Ataatsimiititaliaq naliliilluni aallaqqaasiussaat. Siunnersuinissamut aggersaammik tigusaqarsimanngilanga, taamaattumik taakkua pisortani sulinitsinni najoqqutareqqusat malillugit maani piginngisagut tunngavigalugit taanna oqaatigisimavara ilisarisinnaanagu, Jens Immanuelsen oqarpoq.

AAMMA ATUARUK 10 for og otte imod: Jens Immanuelsen undgår mistilliderklæring  

Jens Immanuelsenip ataatsimiititaliap siulittaasua, Henrik Fleischer marlunngornermi ataatsimeeqatigisimannginnerarpaa.

- Immikkut oqaloqatiginngilara. Taamaallaat Siumumi gruppimi saqqummiunneqarpoq

- Henrik Fleischerimit oqaaseqartitsisinnaasimanngilagut. Ilaa nalinginnaasumi gruppimi piareersarnermi imaattarpoq, aqagumut suliassat gruppimi suliarineqartarput, suliarineqarneranilu killiffii tunngaviilu oqallisigineqartarlutik Henrik Fleischerip oqaatigisimasaa taannaasinnaavoq, Jens Immanuelsen.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat