Peqqissutsimut naalakkersuisoq Anna Wangenheim.Assi: KNR / Malik Brøns

Naalakkersuisoq pissartanngorniunnissaq pillugu: KAK-p kissaatai akuerisinnaangilagut

Naak arsartartut kattuffiata pissartanngorniuttoqarnissaanut iliuuserineqarsinnaasut siunnersuutigigaluarai ukioq manna pissartanngorniuttoqassanngilaq. Corona pillugu malittarisassat taamaaliorsinnaatitsinngitsut, Anna Wangenheim naliliivoq.

Qaammatialunni noqqaasoqareertoq inerniliisoqarpoq: Isikkamik arsaannermi ukioq manna nunatsinni pissartanngorniuttoqassanngilaq.

Tamanna Kalaallit Arsartartut Kattuffiata, KAK-p pissartanngorniunnerit aaqqissuunneqarsinnaanersut taamaatinneqassanersulluunniit pillugu ulluni qassiiusuni oqallittoqangaatsiareersorlu Facebookikkut marlunngornermi unnukkut nalunaarutigaa.

AAMMA ATUARUK Arsartartoq pissartanngorniunnissat taamaatinneqarnerat pillugu: Mamaatsoornaq

KAK-p coronamut allattoqarfik suleqatikkuminaannerarlugu unammisaqattaarnerillu naammassinissaanut periarfissanik isiginninniannginnera pillugu isornartorsiorpaa.

Katerisimaarnermut malittarisassat

Inuit amerlanerpaamik 100-it decembarip ulluisa 31-ata tungaanut illup iluani katersuussinnaapput. 

Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa." 

KAK-p Namminersorlutik Oqartussat Corona pillugu aqutsisoqarfillu suliaq taanna pillugu sapaatip-akunnerata naanerani ataatsimeeqatigai.

KAK oqarnera naapertorlugu kattuffiup periarfissaasinnaasut qassiiusut – pissartanngorniuttoqarnissaata naammassiniarnissaanut cup-imik aaqqissuussinerit tassa unamminerit tamarmik illoqarfimmi ataatsikkut katersortinnagit ilaatigut siunnersuutigigaluarpaa.

Coronami pillugu malittarisassat pissartanngorniuttoqarnissaanut akornusiivoq. Namminersorlutik Oqartussaniimmi nalunaarut nutaaq naapertorlugu kommunimiit kommunimut allamut angalalluni aaqqissuussinernut peqataanissamik nalunaarfigineqartussanut angalasoqaqqusaanngilaq.

Periarfissaqanngitsoq

Namminersorlutik Oqartussalli KAK-p kissaatai eqquutsinniarlugit malittarisassanik allanngortitserusunngillat. Tamanna peqqissutsimut naalakkersuisup, Anna Wangenheimip (D) KNR-imut pingasunngornermi ualikkut mailernerani allassimavoq.

- Sapaatip-akunnerata naanerani pissutsit misissuiffigilluarpakka, takorloorneqarsinnaasullu tamarmik saqqummiunneqartut misissorneqarput, naalakkersuisoq mailikkut allappoq.

- Pissartanngorniuttoqarnissaata aaqqissuunnissaanut periarfissatut ilusilerneqartut nalunaarutip killiliussaaniissimanngillat.

AAMMA ATUARUK KAK frustreret: Vi kan ikke påvirke, hvordan reglerne skal se ud

Anna Wangenheimip oqarnera naapertorlugu katerittarnissamut nutaamik sapaatip-akunnerani matumani nalunaruteqartoqangajalerpoq – allannguuteqartoqangaarnavianngilarli.

- Tassa KAK-mit aaqqiissutaasinnaasutut siunnersuutigineqartut akuerineqarsinnaanngillat, naalakkersuisoq mailikkut allappoq.

KAK-p kisimiilluni naak corona pillugu malittarisassaqaraluartoq pissartanngorniuttoqarnissaa kissaatigisimanngilaa. Demokraatinit, Nivi Olsenip Siumumiillu Erik Jensenip pissartanngorniuttoqarnissaata aaqqissuunnissaanut iliuuseqartoqarsinnaanera aamma oqaatigisimavaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat