Naalakkersuisoq: Peqqinnissaqarfimmi missingersuutit piviusorsiunngillat
Aningaasanik inatsisissamut missingersuusiornerup saniatigut immikkut ittumik aningaasaleeqqittarneq, Per Berthelsenip isoraa.
- Takusinnaajuarparput ukiut tamaasa immikkut ittumik aningaasaliissutit qaqittariaqartartut, tamakkualu tassa annernartuartarput, Per Berthelsen oqarpoq.
Aningaasaqarnermut Naalakkersuisoq Per Berthelsen isumaqarpoq Peqqissutsimut Naalakkersuisoqarfiup aningaasat pisariaqartinneqartut nalilersoruminaatsittarsimagai, Peqqinnissaqarfimmullu pisariaqartitsineq pillugu nalilersuinermi attaveqaqatigiinnerluttarsimasut.
- Sakkussagut piviusumik aningaasaliinissamut amigartut malunnarput, taamaattumik misissuiniarta taamaalillutalu peqqinnissaqarfimmik pitsaasumik naammaginartumillu ingerlatsisinnaaneq anguniarsaralugu, Per Bethelsen oqarpoq.
Peqqinnissaqarfimmi sulisut peqqinnissaqarfimmi pisariaqartitsineq aallavigalugu aningaasaliisoqartanngitsoq oqariartuutigaat. Per Berthelsenip nakorsat isumai assigalugit naliliisoqarnissaa pisariaqarnerarpaa.
- Peqqinnissaqarfik tamakkiisumik isigalugu avataaninngaanniit suliamut attuumassuteqanngitsumit nalilersortinneqassaaq, peqqinnissaqarfiup pitsaasumik ingerlanneqarnissaanut pisariaqartitsineq qanoq ittuusoq qulaajarneqarluni, kingorna piviusumik qanoq akeqassasoq takuneqarsinnaaqqullugu, Per Berthelsen oqarpoq.