Naalakkersuisoq: Paggatassiinikkut qaleralinniartarneq unittariaqarpoq
Aamma Qeqertarsuup tunuani umiatsiaararsorlurik oqaleralinniartut ajornartooqqasut pisasseqinissaannut periarfissaqarnersoq, Ane Hansenip Pinngortitaleriffik suleqatigalugu misissussavaa.
Qeqetarsuup tunuani umiatsiaararsorlutik qaleralinniartut ukioq manna pisassaat arfininngormat nungoreersullu, Ane Hansen taama nalunaarpoq.
- Periarfissanik assigiinngitsunik misissuinikuuvugut, taakkualu kattuffinnut ulluni makkunani oqaloqatigiissutigissallutigit. Aamma Qaasuitsup Kommuniata borgmesteria aqagu ataatsimeeqqatigisussaavara, ukiup sinneranut iliuusissagut ikioqatigiissutisagullu assigiingitsut oqaloqatigiissutigalugit, Ane Hansen KNR-mut oqarpoq.
Aalisartut kattuffiit KNAPK aamma GA Ane Hansenimut marsip 27-ani saaffiginnissuteqarput, sinerissap qanittuani qaleralinniarnermi isumakuluutitik apuullugit.
Isumakuluutaallu eqquupput, Qeqertarsuup tunuani umiatsiaararsorlutik qaleralinniat ukioq manna pisassaat arfininngormat nungummata, aammalu Upernavimmi Uummannamilu umiatsiaararsortut nunguutseqqajaallutik.
Tamannalu tunualiaqutigalugu umiatsiaararsorlutik aalisartut ukiup sinnerani aningaasarsiorfissanik allanik isiginiaqqullugit, aalisarnermut naalakkersuissup kaammatorpai.
- Kapisilinniarneq aggustip aallaqqaataani ammarpoq. Aavarneq makitaasimasunullu umimmanniarneq aamma ammarput. Taakkualu saniatigut takusinnaavarput, ukioq mannamut saarullittassiissutit suli sinneqartupilussuit, Ane Hansen oqarpoq.
Aasaq mannali pissutsit aappaagu uteqqineqannginnissaat eqqarsaatigalugu, paggatassiilluni aalisartarnerup, umiatsiaararsortut pisassaasa ukioq manna nungulertornerannik kinguneqartup, unitsinneqarnissaanut, Ane Hansen maanna piareersimavoq.
- Assersuutigiinnarlugu kvartalikkaartumik kvotalersuineq Uummannami misilitsipparput, siunissami tamatuma atrorneqarsinnaanissaanik oqallitsitsinissaq siunertaralugu. Aamma aalisartut akornanni taanna eqqartorneqangaatsiartoq tusaasinnaavara.
Aalisarnermut Naalakkersuisup, Ane Hansenip, aamma Pinngortitaleriffik saaffiginiarpaa, Qeqertarsuup tunuani qaleralittassat amerlineqarsinnaanerisa misissornissaat siunertaralugu.
- Aap, illersorneqarsinnaasumik taanna angusinnaagutsigu, taanna periarfissatut msissukkatta aamma ilagivaat, Aalisarnermut naalakkersuisoq Ane Hansen oqarpoq.
