Kirsten Fencker peqqissutsimut naalakkersuisuuvoq.Assi: KNR

Naalakkersuisoq: Nuummi nutaanik killilersuisoqassanngilaq – misissuisarfilli nuunneqarsinnaavoq

Nuummi corona sukkasuumik tuniluutilermat pissutsit allanngupallapput, nakorsaaneq Henrik L. Hansen oqarpoq.

141.

Tassa matuma allannerata nalaani nuna tamakkerlugu tunillatsissimasut taama amerlatigaat. Taakkunannga 133-t Nuummiillutik.

- Sapaatit akunnerisa kingulliit marlussuit ingerlaneranni Nuummi corona sukkasuumik tuniluutivittutut oqaatigisariaqalerpoq, nakorsaaneq Henrik L. Hansen oqarpoq.

- Tassa tunillatsittut agguaqatigiissillugit ullormiit ullormut amerliartorput.

Akiuussuserneqarsimasut ataatsimut

Avannaata Kommunia:
Siullermeertumik akiuussuserneqarsimasut: 70 procentit 
Tamakkiisumik akiuussuserneqarsimasut: 58 procentit

Kommune Qeqertalik: 
Siullermeertumik akiuussuserneqarsimasut: 72 procentit
Tamakkiisumik akiuussuserneqarsimasut: 60 procentit

Qeqqata Kommunia: 
Siullermeertumik akiuussuserneqarsimasut: 70 procentit
Tamakkiisumik akiuussuserneqarsimasut: 64 procentit

Kommuneqarfik Sermersooq: 
Siullermeertumik akiuussuserneqarsimasut: 75 procentit
Tamakkiisumik akiuussuserneqarsimasut: 67 procentit

Kommune Kujalleq: 
Siullermeertumik akiuussuserneqarsimasut: 72 procentit
Tamakkiisumik akiuussuserneqarsimasut: 63 procentit

- Taamaammat maannakkuugallartoq, Nuummi tunillatsittut amerliartuinnarnissaat ilimagisariaqassavarput. Manna tikillugu tunillatsiffiukkajuttunit piinnarani amma allani tunillatsittoqartalissaaq.

Tamannalu nuummiorpassuit aamma ilimagaat. Ulluni arlalinni misissuisarfimmi inuit amerlaqisut akunnerit marluk pingasulluunniit utaqqereerlutik aatsaat, vatpindi takisooq torluminnut mangullugu misissortittarput.

Nillertumi utaqqisoqartarunnaassasoq

Tamanna allanngortittariaqarpoq, KNR-imi Nunatta Nipaanut Peqqinnissamut Naalakkersuisoq Kirsten Fencker (Naleraq) oqarpoq.

- Misissuisarfik alamut nuunneqarsinnaanersoq misissorparput. Taamaaliortariaqarpugut silataani inuit utaqqisarunnaaqqullugit. Nuussinnaalerpat nalunaarutigiumaarparput.

Immikkut ittunik iliuuseqarsinnaanerup sumut killeqarnera tusarusukkaluarpara? Pissutsit qanoq ilippata killilersuinerit sukateriffigissavisigit?

- Tamanna oqaatigiuminaattorujussuuvoq, pissutsit ullut tamaasa naliliiffigisaratsigit. Tunillaassornera qanoq ingerlava? Kikkut eqqugaappat? Killilersuutit sukaternissaannut qasuternissaannullu pissutsit suut aallaavigisarpisigit.

Sapaatip akunnerata siuliani tunillatsissimasut arfineq marluusut

Sapaatip akunneri marluinnaat matuma siorna Nuummi tunillatsissimasut arfineq marluinnaapput. Tamatumali kingorna covid-19 uteriarujussuarpoq – tamatumuuna paaqqinnittarfik Timmiaaqqat tuniluuffiuvoq. Tassani meeqqat angajoqqaallu tunillatsipput, tassanngaanniillu paaqqinnittarfinni allani, sukisaarsaartarfinni atuarfinnilu tunillatsittoqartalerluni.

Henrik L. Hansen, suli kikkulluunniit tunillatsissinnaappat?

- Aap. Maanna tunillatsittartut tassaanerupput tunillatsissimasumik qanillattuinikkut tunillatsissimasut. Allalli tunillatsissimasut nutaat illoqarfimmiissimasarput. Sapaatip akunnerata naanerani siornani ilimanarlunilu aamma kingullermi tuniluuttoqarsimanera ilisimavarput, tamatumalu saniatigut atuarfinni paaqqinnittarfinnilu tuniluuttoqarluni, nakorsaaneq oqarpoq.

AAMMA ATUARUK Rekordhøjt smittetal: Vi har brug for flere testcentre i Nuuk

- Tunillatsissimasulli sumerpiaq tunillatsissimanerinik ilisimasaqarfiginngisagut siumortuarpagut. Taamaammat arlaat tunillatsissimasutut ilisimanngisarput, sumi tamaani allanik tunillaaqattaarpoq.

Inuit akiuussutissamik kapitinnissartik periarfissaraat, taanna oqarpoq. Tamakkiisumillu akiuussutissamik kapitikkaanni, tunillanneqarsinnaaneq annikitsuararsuummat.

- Allatut atorneqarsinnaanngilaq, akiuussutissaq pisariaqarpoq. Maanna Nuummi tuniluunnerata sapaatip akunnerata tulliani unitsissinnaanissaa ilimagisinnaanngilluinnarparput. Nappaat sivisuumik maaniikkallassaaq.

Sapaatip akunnerani qaangiuttumi Nuummi coronapassi atorneqaleqqippoq. Tassa, sutorniarfiliassaguit imerniartarfiliassaguilluunniit misissortinninni imaluunniit tamakkiisumik akiuussutissamik kapitinnikuuninnik uppernarsaat takutissinnaassavat.

Nunatsinni coronavirusi pillugu
killiffik

Tunillatseqqasut 202  
Ullumi tunillatsittut 41  
Siullermik kapitissimasut 71%  
Aappassaa kapitissimasut 66%  
Tunillanneqarsimasut 1621  
Uninngasut 2  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Decembarip 6-at 14:20
 

Coronavirusimik tunillatsinissaq pinaveersaaruk