Naalakkersuisoq Nick Nielsen naveerneqartoq
Elevrådi tusagassiorfinnut nalunaaruteqarluni Nick Nielsen tunngaveqarluartumik akissuteqarfigaa. Elevrådilu tusagassiorfinnut nalunaartumini Nielsenip isumassarsiai pilersaarutaalu sakkortuumik isornartorsiorpai neriunaateqanngitsutullu taallugit.
Ilinniarfiup Nuummit Qaqortumit nuunnissaanik pilersaaruteqarnermi saniatigut, Nick Nielsenip ilinniartitaanerup NI 1-p atorunnaarsinnissaanik aamma pilersaarluni oqarsimavoq, naak ilinniartitaanermi tassani ilinniartut ilinniartitaanikkut ingerlaqqinnissaminnut pisariaqartitaminnik tassani ilinniarsinnaasarsimagaluartut.
Ilinniartut naalakkersuisumut Nick Nielsenimut ima allagaqarput:
Niuernermik ilinniarfimmi ilinniartuusugut piviusut tunngavigalugit ingerlassasugut. Taamaammat piviusut ilaat matuma saqqummiutissavagut:
Piviusoq tassaavoq inuusuttorpassuit ilinniarneq ajormata - matumanilu NI 1 neqeroorutaavoq pitsassuaq, ilinniarnertuunngorniarfiup kingorna ingerlariaqqinnissaq ajornartorsiutigigaanni. Ilinniartitaanerup qaffasissusaanut tunngatillugu Nunatsinni kinguaattooqavugut - NI 1-llu atorunnaarsinneqarneratigut tamanna iluarsineqarnavianngilaq.
Arlaqarpugut ilinniarnertuunngornitta kingorna atuakatanneq pissutigalugu allanilluunniit peqquteqartumik ukiualunni sulisimasugut imaluunniit angalasimasugut - taava sumut saariassaagut?
Ilinniartuuvugut arlallit ilinniaqqinnissatsinnut matematik B-mik tuluttullu A-mik pisariaqartitsisugut - taava sumut saariassaagut?
Nick Nielsenip inuusuttuusugut piviusumut piviusuunngitsumut inissinniarsarigunarpaatigut, aaqqissuussinermut uagut inuusuttut naleqqussartinniarsaraluta, paarlattuanngitsoq aaqqissuussineq uatsinnut pisariaqatitatsinnullu naleqqussarlugu.
NI 1-imi ilinniartuuneq imaannaanngitsuuvoq. Ullormit siullermit aannertuumik piumaffigineqartarpugut, ilinniartuunitsinnilu aatsaat takusinnaalersimavarput iliuutsit kingunissaallu imminnut atasuusut. Taamatut misilittagaqalernerput siunissami iluaqutigisassarput, aningaasarsiornerup iluani sulilernissatsinni, AU-mik ilinniarnissatsinni imaluunniit ilisimatusarfimmi ilinnialernissatsinni.
Imaassinnaavoq ingerlaqqiffiusumik ilinniarnermut tunngatillugu NI 1 uiarterinerusoqm ukiullu 10 -11-it ingerlanerini ilinniaqqissinnaasimasut 200-nit amerlanerusut ullumikkullu pitsaasunik ilinniagaqartut pitsaasunillu suliffeqartut nunatsinnilu inuiaqatigiinnut iluaqutaasut eqqarsaatigineqartariaqarput - NI 1-eqarsimanngitsuuppat ilinniagaqaratik suliffittaaginnarsimassagaluarput, suliffissarsisinnaasimassagunik!
Ilinniarnertuunngorniarfimmi allagartaarsimasut ilinniakkaminnik atuinngitsut ullumikkut amerlareerput, NI 1-eqanngippallu taakku amerliartuinnassapput - ineiartorneq taama ittoq inuiaqatigiit kissaatigivaat akilerusullugulu?
Inuiaqatigiit inuusuttunik matematikimik, oqaatsinik, aningaasaqarnermik, tuniniaanermik, nuna tamalaani aningaasaqarnermik nutaaliornermillu piginnaasalinnik pisariaqatitsippat? Taamaappat NI 1 attorneqassanngilaq.
Elevrådillu Nuummi niuernermik ilinniarfimmi ilinniartut sinnerlugit naggataatigut Nick Nielsen kaammattorpaat ilinniartitaaneq immikkut sammeqqullugu akisussaaffeqarfiillu naalakkersuiqarfimmi ataaniittut allanut isumagiteqqullugit. Taamaaliornikkummi ilinniartitaaneq pingaarnerutillugu sammineqalissammat kaammattuutigaatugut, ilinniartullu tamanna pingaaruteqarluinnaartutut isigaat.
