Naalakkersuisoq misissortikkusuttunut: Naammagittartariaqarpusi

Vivian Møller Johansen Sisimiuni peqqinnissaqarfimmut ullaaq manna 77-eriarluni sianerpoq.

Taanna naggussaminik anniarpoq, niaqorluppoq kakkilertallunilu taamaammat coronamut misissortikkusuppoq. SIsimiuni tunillatsissimasut maanna sisamaapput, Nakorsaaneqarfiullu oqarnera naapertorlugu Sisimiuni tuniluuttoqarnera ilimanarluinnarpoq.

Vivianilu tallimanngorpat katittuniittussaavoq taamaammat ulloq taanna nallertinnagu tunillatsissimannginnerluni paaserusuppaa.

Vivianip misissortinnissaminut inniminniiniarluni sianeqattaarnini kiisami iluatsikkamiuk nalunaaqutaq ataatsinut sianeqqinnissaminik taamaallaat oqarfigineqarpoq.

AAMMA ATUARUK Vivian Sisimiuni napparsimmavimmut iluatsinngitsumik 77-eriarluni sianertoq

Tassanilu naammagittarsinnaajunnaarpoq:

Assi © : Privat

Privatfoto

- Nuummi ullut tamangajaasa ammasartumik misissuisarfeqarpoq, inuit tassunga takkutiinnarsinnaapput. Soorunami Sisimiuni taamaattoqanngitsoq? Maani oqarasuaatikkut iluatsitsiniarluta ilungersortarpugut. Misissuisarnerup ilusilersugaalluarnerunissaa kissaatigaara, taanna KNR-imut ullumi oqarpoq.

Peqqinnissaqarfiit nukingertut

Ornigutiinnarluni misissuisarfeqarnissaa naatsorsuutigisinnaanngilaa. Taannalu allallu misissortikkusuttut aamma naammagittartariaqartut, peqqinnissamut naalakkersuisoq, Kirsten Fencker (Naleraq) oqarpoq.

- Inuit misissortikkusunnerat paasisinnaavara. Kisianni tunillatsissimasut pingaarnerutippagut. Nujaleriffiliarniartut imaluunniit imerniartarfiliarusuttut kingulliunneqartariaqarput. Ataatsimoornissat kinguartinneqarsinnaappata kinguartinneqarlik, Kirsten Fencker oqarpoq.

- Peqqinnissaqarfiup misissuisarfianut apeqquterpassuaqarlunilu nukingernartorpassuaqarpoq. Aamma pinasuartumik napparsimasut napparsimmavimmut attaveqarniarnerat ajornakusoorpoq.

- Sumiiffinni tamani ersiuteqartunik misissuisoqangaatsiarpoq. Tulliullugu tunillatsissimasumut qanillisimasut ullut arfineq-marluk qaangiunneranni misissortissapput kiisalu nunatsinnut tikinnermit ullut tallimassaanni misissortittussat, Kirsten Fencker oqarpoq.

Sisimiuni tuniluttoqarnissaa ilimanartoq

Vivian Møller Johansenip akissut taanna atorsinnaavallaanngilaa:

- Napparsimmavimmut sianerniarnerup ajornarnerani ersiuteqartunut misissortinnissamik kaammattuinerat paasissaanngilaq, taanna oqarpoq.

Taanna – qasseeriarujussuarluni sianeqattaareerluni – misissortinnissamut piffissami tunineqarpoq.

KNR-ip Sisimiuni peqqinnissaqarfik sooq 77-eriarluni aatsaat sianeqqaarluni iluatsitsisoqarsinnaanera akissuteqarfigeqquaa.

Peqqinnissaqarfik KNR-ip apeqqutaanut akissuteqarnissamut piffissaqanngilaq.

Sisimiuni ullualunni coronamik tunillatsissimasoqanngereerluni tunillatsissimasut nutaat ippassaq paasineqarput. Sisimiuni sisamanik tunillatsissimasoqarnera Naalakkersuisut ippassaq unnukkut kingusissukkut uppernarsarpaat.

Sisimiuni coronamik tunillatsissimasoqarnera pissutigalugu peqqinnissaqarfiup matui matuneqartut peqqinnissaqarfiup Facebookikkut ullormi siusinnerusukkut nalunaarutigaa. Napparsimmavimmi uninngasut aamma pulaarneqarsinnaajunnaarput.

AAMMA ATUARUK Corona: Sisimiuni tunillatsissimasut nutaat sisamat

Sisimiunilu tunillatsissimasunit sisamanit ataaseq peqqinnissaqarfimmi sulisuusoq ullormi kingusinnerusukkut paasineqarpoq.

Peqqinnissaqarfinnilu misissuisarfinnut nukingernartut annertuneruleraluttuinnarpasipput.

Nunatsinni tunillatsissimasut maanna 46-pput, taakkulu amerlissasut, Nakorsaaneqarfimmit nakorsap, Paneeraq Noahsenip nalilerpaa:

- Nutaanik tunillatsittoqartarnera sukkasoorujussuuvoq, taanna oqarpoq.

- Inuit ersiuteqaraluarlutik katerinnerniissimasut, ikinngutiniissimasut, neriniartarfimmiissimasut imerniartarfinniissimasullu arlaleriarluta paasivarput. Taamaammat ersiuteqaraanni nammineq mattuttoqartarnissaa kaammattuutigeqqissavarput. Tamanna pingaaruteqarluinnarpoq. Immitsinnut ungasillisimaarnissarput, tunillannartuiaammik atuinissarput aamma katerittuniinnaveersaarnissarput qanimullu naapittakkatta ikinnerpaaffissamiitsinnissaat pingaartorujussuupput.

Tunillatsissimasut juulimi amerlingaatsiartut

Tunillatsissimasunik nalunaarsuinerit arlaleriarluni 0-imiissimavoq - kisitsit taanna juulip aallaqqaataani aamma 0-imiippoq - tunillatsissimasulli tamatuma kingorna amerliartuinnalerput. Tuniluunneq Ilulissani, Nuummi Qaqortumilu aallartippoq - tunillatsissimasullu taakku tamarmik nunatsinnut Københavnimiit timmisartorsuarmut juulip ulluisa arfernanni marlunngornermi ilaaqatigiissimallutik.

Taakku coronamik tuniluutianerusumik deltamik tunillatsissimasuupput, tuniluunnerlu sineriammi illoqarfinnut siaruaappoq.

Tamatuma kingunerisaanik killilersuinerit sukannersut tassa inuit amerlanerpaamik 20-oqqusaanerat kikkullu tamarmik tamanit ornigarneqartuni qanermut assiaquteqaqqusaanerat atuutilersinneqarput.

AAMMA ATUARUK Coronapas pisiniarfinni piumasaqaataassanngilaq: Malittarisassat unnuap-qeqqanit atuutilertussat aaku

Malittarisassalli taakku nunatsinni sumiiffinni amerlanerpaani arfininngornermi atorunnaarsinneqarput. Taakkununngalu taarsiullugu tamakkiisumik akiuussuserneqarsimanermut uppernarsaat imaluunniit coronamik tunillatsissimannginnermut uppernarsaat sivisunerpaamik akunnernik 48-nik pisoqaassuseqartoq atorlugit neriniartarfimmut, timersortunut, imerniartarfinnut, atuakkanik atorniartarfimmut, filmertarfimmut allanullu aatsaat isertoqarsinnaalerpoq.

Pisiniarfimmut atuarfimmulluunniit iserniaraanni tunillatsissimannginnermut uppernarsaateqarnissaq tamakkiisumilluunniit kapitissimanissaq piumasaqaataanngilaq.

Aasianni, Upernavimmi Upernaviullu nunaqarfiini piffissami matumani aqunneqarsinnaanngitsumik tuniluuttoqarnera pissutigalugu malittarisassat atuutiinnarput.