Naalakkersuisoq: Meeqqat atugaat pitsanngorsaaffigilereerpavut
Malussarniarnermut misissuinerit kingulliit ilisimaneqalernerat Naja Petersenip patsisaatippaa, erseqqissaatigalugu meeqqat kaallutik innartarnerat ullaakkullu nerisimanatik atuariartortarnerat Naalakkersuisuni akuersaarsinnaanngikkitsik.
- Siusinnerusukkut taama misissuisoqartarsimanngilaq, maannalu qulaajaanerit sukumiisut inerneri ilaatigut eqqumaniarnerulernermut peqqutaapput. Inatsisit pisortat ikiorsiissuteqarnerannut tunngasut, meeqqanut tunngasut kiisalu aningaasatigut ikiorsiisarnermut tunngasut misissortippagut siunertaralugu, ikiorneqartariaqartut kommunini ikiorneqarnissaannut tunngavissat pitsaanerulernissaat.
Naja Petersenip ilanngullugu oqaatigaa ukiuni kingullerni misissuinerit aallaavigalugit Naalakkersuisut iliuuseqalereersut. - Ikiorsiissutaasartut assigiinngitsut qaffanneqarput, oqartoqarsinaanngilarlu kinguneqartitsisoqanngitsoq.
Nutaarsiassaqartitsivik Ritzau ualimut allappoq, folketingimi amerlanerussuteqartut Nunatsinni meeqqanik kaattoqartarnera pillugu ikiuukkusullutik piareersimalersut, Nunatsinnilu politikerit iliuuseqannginnerarlugit isornartorsiuisut. Kalaallit Nunaanni meeqqat pitsaasumik alliartornissat qularnaarneqartariaqarpoq. Meeqqat angajoqqaaminnit sumiginnarneqarlutik kaallutik innartariaqartarnerat akuerineqarsinnaanngilaq. Dansk Folkeparti, Konservativit Socialdemokratillu taama isumaqarlutik kalaallit meerartaannut ikiuukkumapput.
