Naalakkersuisoq kollegiessaaleqineq pillugu ataatsimeeqatiserineqassaaq
Kommuneqarfik Upernavimmi atuartut illoqarfimmi kollegiassaaleqissunneqarnerat, iluarsiniarlugulu 1999-imili sulissutigineqalersimasup piaartumik iliuuseqarfigineqarnissaa siunertaralugu ilinniartitaanermut naalakkersuisoq ataatsimeeqatiserineqalerpoq.
- Ataatsimeeqatiserinnissaavut, aningaasaliisinnaassuseqanngikkaluarlutalu sunniiniarsinnnaavugut iliuuseqartoqaqqullugu. Ilinniartitaanermut ataatsimiititaliap siulittaasua Siumumeersoq Doris Jakobsen taama oqarpoq.
Upernavimmi atuartut ineqarfiata mikivallaalersimanera kommunalbestyrelsip Inatsisartullu ilinniartitaanermut ataatsimiititaliaata ippassaq ataatsimiissutigaat.
Upernavimmi ineqarfiup mikivallaalersimanerata kingunerisaanik atuartut nunaqarfinneersut katillutik 91-it illoqarfimmut atuarnerminnik nangitsiartorsinnaanngillat, taakkunanngalu pinngitsooratik 10. klasseriartussat, 17-it, ukiaru atuarneq aallarteqqippat suli inissarsineqarnatik.
Borgmester Jens Immanuelsenip erseqqissaatigaa, kommunalbestyrelsip aappaagumut sanaartugassanut tunngatillugu qinnuteqaatigereersimagaa, atuartunut 90-inut inissalimmik ineqarfiliornissaq.
Upernavimmut 10-klasseriartussanit 22-init 17-it inissarsiniarneranni periarfissat assigiinngitsut maanna misissorneqarput, Jens Immanuelsenilu oqarpoq, atuartut pineqartut ataatsimoortumik illumik ineqarfigisinnaasaannik maanna aaqqiniartoqartoq.
Inatsisartut ilinniartitaanermut ataatsimiititaliaani siulittaasoq Doris Jakobsen isumaqarpoq, Upernavimmi atuartitaanikkut pissutsit ilungersunartut Namminersornerullutik Oqartussat akisussaaffigigaat, taakku suliassanik pingaarnersiuisarmata. Taamaattumik piaartumik iliuuseqarnissaq pisariaqarnerarpaa, meeqqap pinngitsoorani atuartitaanissani pisinnaatitaaffigimmagu.
- Namminersornerullutik Oqartussat akisussaaffigaat, taamaattumik suliassanik ukiunut tulliuttunut tulleriiaarinermi salliutinniarneqarnissaanut tapersersuissaavut. Pissutsit maannakkut atuuttut akuerineqarsinnaanngillat, piaartumillu iliuuseqarfigineqartariaqarput. Doris Jakobsen erseqqissaavoq.
