Inuit Ataqatigiinneersoq Peter Olsen Nuummi ilinnialerusukkaluarlutik ukioq manna kollegiassaqanngitsut 37-t arlaatigut iliuuseqarfigisinnaanerlugit misissuiniarpoq.

Naalakkersuisoq kollegiassaaleqineq pillugu: Neriorsuerusunngilanga

Kollegiassat aappaagu piareeriarpata Nuummi kollegiassaaleqiunnaartoqassasoq, ilinniartitaanermut naalakkersuisup Peter Olsenip neriuutigaa.

- Tusaalluarpakka, paasilluarpakka aamma neriuppunga arlaatigut ikiorsinnaajumaarlugit.

Ilinniartitaanermut naalakkersuisoq Inuit Ataqatigiinneersoq, Peter Olsen, Nuummi ilinnialerusukkaluarlutik ukioq manna kollegiassaqanngitsut 37-t pillugit taama oqarpoq.

Suliaq naatsumik:

 

Kollegiassaaleqisoqartarnera tusarnartaanngilaq.

 

Nuummi ukioq manna kollegiassarsinngitsoortut 37-upput.

 

Nuummi kollegiassat 219-inik siniffissaqartitsisussat pilersaarutit malillugit aappaagu iserterfigeriaannanngussapput.

 

Nuummi ilinnialerniarlutik kolligiassaaruttut 37-t inissarsiuunneqassasut, SIK-p inuusuttaasa piumasaraat.

 

Inissianik attartorallarnikkut aaqqiisoqassasoq, Siumup, Demokraatit Atassutillu siunnersuutigaat.

Inuusuttut piukkunnartut kollegiassaqannginnertik peqqutigalugu ilinnialinngitsoortariaqartortaqartut, KNR-ip siusinnerusukkut oqaluttuaraa.

AAMMA ATUARUK Kollegiemangel: Sundhedsstuderende udskyder eller dropper studiestart

Ilinniartitaanermut naalakkersuisup arlaatigut iliuuseqarfigisinnaanerlugit misissuiniarluni oqaatigaa, aammali neriorsuisinnaannginnerarpoq. Ajornartorsiulli tamanna aamma tupaallaatiginngilaa.

- Ajoraluartumik nutaarsiassaanngilaq, ukioq manna taamatut aatsaat pisoqalinnginnami taamaattoqartuaannarpoq qangali qangarsuarli, Peter Olsen oqarpoq.

Inissianik attartorallaqqusisut

KoIlegiassaqannginnertik peqqutigalugu nunatsinni ilinnialinngitsoortartut ukiumut katillutik 80-it 90-illu akornanniikkajuttut, Peter Olsen oqarpoq.

Nuummi ilinnialerniarlutik kolligiassaaruttut 37-t inissarsiuunneqassasut, SIK-p inuusuttaasa piumasaraat.

- Kalaallit nunatsinni ilinniarniartut itigartittaaginnarsinnaanngilagut oqarluta kollegiassaqartinngilatsigit, SIK-p inuusuttaasa siulittaasuat Peter B. Mølgaard oqarpoq.

Inissianik attartorallarnikkut aaqqiisoqassasoq, Siumup sapaatit akunnerata siuliani siunnersuutigaa. Siunnersuutaalu Demokraatinit Atassummillu taperserneqarpoq.

AAMMA ATUARUK Mangel på kollegier: Partier vil fremleje boliger for at løse problemet

Nuummili kollegiassaaleqineq aaqqiivigineqariaannaanngitsoq, ilinniartitaanermut naalakkersuisoq oqarpoq.

- Ajornartorsiut taanna ajoraluartumik massakkut aaqqeriaannaanngilarput. Ajornartorsiulli taanna aaqqiiviginiarlugu kollegialiortitsileruttorpugut, Peter Olsen oqarpoq.

Kollegiassat pilersaarutit malillugit aappaagu iserterfigeriaannanngoriarpata 200-nit ikinnerunngitsunik siniffissaqartitsissapput.

Kollegiassaaleqisoqarnera ajuusaarutigigaa

Ilinniartitaanermut naalakkersuisup kollegiassaaleqisoqarnera ajuusaarutigeqaa.

- Tamanna kialuunniit naalakkersuinikkut aamma suliaqartup soorunami naammaginngilaa akuersaarsinnaanagulu, taamaattumik uggornarlunilu ajuusaarnarpoq, taanna oqarpoq.

AAMMA ATUARUK Nuummi ukiorpassuit kollegiassaaleqineq suli taamaappoq

Peter Olsenillu Nuummi ilinnialerusukkaluarlutik ukioq manna kollegiassaqanngitsut 37-t arlaatigut iliuuseqarfigisinnaanerlugit misissuiniarluni oqaatigaa, aammali neriorsuisinnaannginnerarpoq.

- Oqaloqateqassaanga, neriorsuinngilanga neriorsuinerloqinagamalu neriorsuissanngilanga. Kisianni aap pingaartutut pisariaqartutullu aamma tiguara aamma isigivara.

Avataatigut attartornissanut amerlanerusunut isumaqatigiissusiortoqassasoq, partiit arlallit siunnersuutigaat. 2022-mulli aningaasaliissutit atorneqareersimammata illuartinneqarsimallutilluunniit taamaaliortoqarsinnaanngitsoq, ilinniartitaanermut naalakkersuisoqarfimmi pisortaq Karsten Peter Jensen KNR-imut sapaatit akunnerata siuliani allappoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl