Naalakkersuisoq: Innuttaasut pitsaasunik ineqarnissamut periarfissaqassapput

- Nunarput tamakkerlugu ineqarnermut suliassaqarfimmi annertoorujussuarmik unammilligassaqarpugut, tamanna inissiaatinut pioreersunut atuuppoq, taamaattorli nutaanik sanaartornermi aamma atuuppoq, assersuutigalugu nutaanik sanaartornermi atortussanik toqqaaneq taakkuninngalu sanaartorneq najugaqartunut akornusiinernik ajoqutissartaasunillu pilersitsisinnaammata, Knud Kristiansen oqarpoq.

Tamanna tunngavigalugu nunaqarfinni illoqarfinnilu avinngarusimasuni siunissami illulioriaaseq pillugu Upernavimmi isumaqatigiittoqarnissaa taassuma taamaammat naammasseqqammerpaa.

Nunaqarfinni illoqarfinnilu minnerusuni siunissami illuliortarnermut periarfissat kissaataasullu, atuisut, oqartussaasut najukkaneersut inuussutissarsiortunillu aallartitat peqatigalugit oqallisiginissaat ilaatigut siunertaasoq Naalakkersuisut nalunaarutigaat, ilaatigut sanaqateqarluni illuliassanut nutaanut isumassarsiat ilaasa saqqumiunnissaat aamma siunertaalluni.