Naalakkersuisoq inissitsikkusuppaa

juulip 07-at 2006 10:31

Ilaqutariinnermut Inatsisinillu Atortitsinermut Naalakkersuisoq, Aleqa Hammond inissinneqartariaqarpoq, taama isumaqarpoq Dansk folkepartiimit folketingimi ilaasortaq Søren Espersen.

Søren Espersen inatsiseqarnermut ministerimut Lene Espersen-imut piumasaqarpoq, Aleqa Hammond-ip danskit nutaarsiassaqartitsiviinut sapaatip-akunnerani kingullermi oqaasii akeqqullugit. Naalakkersuisup Aleqa Hammond-ip nunatsinni politiit taamani ikippallaarnerarpai. Nunatsinnili politimesteri oqarluni politiit amigaataanngitsut. Taamaammat Søren Espersen isumaqarpoq Aleqa Hammond naqqinneqartariaqartoq.

Søren Espersen isumaqarpoq Kalaallit Nunaanni politiit naammattut, inoqassuserlu naapertussagaanni, allaat Kalaallit Nunaat Danmarkimut naleqqiullugu politeeqarnerunerarlugu.

Søren Espersen-ilu Lone Espersen-imut ima aperivoq:

- Kalaallit Nunaanni politiit naammannerat ministerip uppernarsarniarnerpaa, aammalu Kalaallit nunaanni innuttaasut ernumassanngitsut ministerip oqariartuutiginiarnerpaa. Naggataatigullu Aleqa Hammond paasissutissanik eqqortunik ilisimatinniarneqarnersoq, Søren Espersen aperivoq, uparuaaninilu ima nangillugu:

- Akuersaarneqarsinnaanngilaq Kalaallit Nunaanni Ilaqutariinnermut Inatsisinillu atortorsinermut naalakkersuisup Aleqa Hammond-ip ilisimasaqarani uppernarsaatissaqaranilu Inatsiseqarnermut tunngasunik taamatut oqalussinnaanera. Søren Espersen isumaqarpoq, Kalaallit Nunaanni inatsiseqarneq pillugu oqallinnermi tamanna paatsuungasumik ingerlatitsilersinnaasoq.