Naalakkersuisoq: Inissiat akiminut naleqquttuussapput
Inissiap sananeqarnerata nalinga aallaaviussasoq, ineqarnermut naalakkersuisoq oqarpoq.
Inissianut akit akitsussanersut akikillissanersulluunniit naalakkersuisup oqaatigisinnaanngikkallarnerarpaa.
- Ineqarnermut akit qanoq inissisimanissaannut sanaartornerit aalajangiisuusaramik. Oqarusunngilanga ukiut siuliini tamatigut taanna malinneqarsimasoq, ilaatigut akit assigiinngitsut pissutaallutik qaffasittarlutik, Knud Kristiansen taama nassuiaavoq.
Taassuma aamma oqaatigaa pisortat inissiaataanni najugaqarnermi akiliutigineqartartut misissoqqissaarneqassasut, inissiat ilaanni akit malinnaatinneqarsimannginneri takusinnaagamigit.
Ineqarneq pillugu isumasioqatigiissitsinermi ippassaq inerniliunneqartut, naalakkersuisup iluarisimaarnerarpai.
Isumasioqatigiinnermi KANUKOKA-miit aamma Inatsisartuni ilaasortat aningaasaqarnermut akileraartarnermut sanaartornermullu ataatsimiititaliami ilaasortat peqataaffigaat.
- Kissaatigineqarpasittoq tusaasinnaavara akit pullataassanngitsut, piviusuusariaqarput, imaanngilaq mekanismit atorlugit nunatta karsia matussuserniarlugu, taanna uagut qimakkusupparput, Ineqarnermut, sanaartornermut attaveqarnermullu naalakkersuisoq, Knud Kristiansen taama oqarpoq.
