Naalakkersuisoq: Inatsit nalimmassarneqarsinnaavoq

Aatsitassanut Ikummatissanullu akisussaaffik Kalaallit Nunaannut ukiortaamiit nuunneqassappat, aatsitassanut inatsisissaq nutaaq inatsisartut ullumi akuerisariaqarpaat.
Allattoq Jaaku Lyberth
novembarip 27-at 2009 13:10

- Inatsisissaq kingusinnerusukkut nalimmassartuarneqarsinnaalissaaq, aatsitassarsiornermut naalakkersuisoq Ove Karl Berthelsen oqarpoq.

Inatsisissaq ullumi akuerineqanngippat suliassaqarfivut tamakkiisumik naalagaaffimmiit tiguneqarnissaat kinguartinneqartariaqassaaq. Aatsitassanut ikummatissanullu akisussaaffiup tamakkiisumik tiguneqarnerani Kalaallit Nunaata nammineq aalajangiisinnaassuseqarnera pitsanngorsarneqarujussuassasoq inuussutissarsiornermut aatsitassarsiornermullu naalakkersuisoq Ove Karl Berthelsen oqarpoq.

Naalagaaffiup Kalaallit Nunaanni aatsitassanut ikummatissanullu akisussaasuulluni oqartussaanera ingerlatiinnarneqassaaq.

Aatsitassanut inatsisissap nutaap nunaqavissunut periarfissiissutai maannakkut atuuttumut sanilliullugu pitsaanerupput. Inatsisissaq nutaaq naapertorlugu kisermaassinngikkaluarluni ujaqqat suulluunniit katersorsinnaalernissaanut ajornarunnaassaaq, tamatuma aamma erlinnartuutit soorlu rubinit pineqarlutik. Akuersissut taamaattoq sumiiffimmut annertoorujussuarmut tunniunneqarsinnaalissaaq, assersuutigalugu kommunip killeqarfia ataaseq tamakkiisoq pineqarsinnassalluni.

Akuersissummik pissarsisut akiliuteqalaarnikkut ujaqqanik katersisinnaalissapput, Ove Karl Berthelsen oqarpoq.

- Soorunami inatsisissami nutaami nunaqavissut ujaqqanik pinnersaasiassanik katersuisinnaanermik pisinnaatitaaffeqarnerat pitsanngorsarnerusinnaavarput. Eqqaamasassarpulli unaavoq inuiaqatigiit pigisaat nalilerujussuit, soorlu ujaqqat erlinnartuutit, rubinit diamantillu taamaattut, tamakkuninnga aningaasartuuteqarniaraanni akileraaruserneqarnissaat avaqqunneqarsinnaanngilaq, Ove Karl Berthelsen oqarpowq, nangillunilu:

- Maleruagassat maanna atuuttut naapertorlugit aatsitassarsiornerup iluani akuersissuteqarfiunngitsumik ingerlatat nakkutiginiarneri ajornartupilussuupput, tamannalu pissutigalugu aningaasat akileraarutitigut isertinneqarsinnaasut amerlasuut annaaneqarsinnaanerinut aarleqquteqartoqarsinnaalluni.