Assi: Jonas Fievé/KNR

Naalakkersuisoq: Inatsisit maliinnarpavut

Tanbreez Mining Kujataani Killavaat Alannguanni saffiugassanik qaqutigoortunik ukiumut tonsinik millionit affaanik annertussusilimmik piiaanissaminik qinnuteqaateqareersimalerpoq, tamannali piiarniakkaminnik amerlanerulersitsiniarnerannut tunngatillugu naammanngitsoq, Naalakkersuisut isumaqarput.

Australiamiut aatsitassarsiortitseqatigiiffiata Tanbreez Miningip saffiugassanik qaqutigoortunik ukioq manna piiaasinnaalernissani neriuutigisimagaluarpaa.

Tunisassiorniarnerulli annertusarneqarnissaanut pilersaarutit pissutaallutik, akuersissummik nutaamik maanna qinnuteqartariaqassapput. Nutaamik qinnuteqarnissamut piumasaqaat, Tanbreezip pisortaata Greg Barnesip tupaallaatigaa.

Inatsisilli avaqqutaarlugit iliortoqarsinnaanngitsoq, Aningaasaqarnermut Naalakkersuisup, Aatsitassanut aamma naalakkersuisuusup, Andreas Uldumip erseqqissarpaa:

Aamma atuaruk Tanbreez: Kalaallit Nunaat aatsitassarsiornikkut unammillersinnaanngilaq

- Inatsisit malittariaqarpavut, aamma aatsitassarsiornermut inatsit tassa malipparput, Andreas Uldum oqarpoq.

Tanbreez Miningip piiaasinnaalernissamut qinnuteqaatimik nutaamik qinnuteqartariaqarnera pillugu Andreas Uldum taama oqarpoq, aatsitassarsiortitseqatigiiffiup taassuma tunisassiornini annertusassaguniuk nutaamik qinnuteqartariaqarnera nassuiaatigalugu.

- Tassungaannaq killittoqarnavianngilaq. Nutaamik qinnuteqaasioqqullugit qinnuigineqassapput, aallartittoqarnissaalu pisortani oqartussatut  sapinngisannguatsinnik isumaginiartussaavarput, Andreas Uldum oqarpoq.

Greg Barnesip sapinngisamik piaartumik piiaasoqalernissaa kissaatigigaluarpaa, qinnuteqaasioqqinnissartillu paasiuminaatsillugu. Taannami isumaqarpoq piiaanissaminnik annertunerulersitsinissartik avatangiisinut annerusumik sunniuteqarnavianngitsoq.

- Siusinnerusumut naleqqiullugu eqqagassat minnerulersinneqarput, taakkumi tunisinnaassavavut. Tonsit millionit affaannut naleqqiullugit tonsit millionit aappaata affaanut igitassaqannginneruvoq, Greg Barnes oqarpoq ilanngullugulu tikkuarlugu qinnuteqaatertik Kalaallit Nunaannit oqartussanit sukkavallaanngitsumik maannamut suliarineqareermat.

Andreas Uldumilli erseqqissarpaa, pilersaarut pingasoriaammik annerulerpat taava nutaamik qinnuteqaasiornissaq pissusissamisuussasoq.

- Pilersaarutip avatangiisinut sunniutissai taamaalillutik takkuitsoorneqassanngillat. Tamannaana pillugu nutaamik qinnuteqaasiortoqartariaqartoq, pilersaarummi taamaalilluni misissoqinneqarsinnaassammat, Andreas Uldum naggasiivoq. 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat