Greenland Mineralsip Danmarkimi aaqqiagiissitsiniartarfimmut suliarisanngortitsisoqarnissaanik kissaateqarnera, aatsitassanut naalakkersuisup, Naaja H. Nathanielsenip uggoraa.Assi: Naalakkersuisut.

Naalakkersuisoq Greenland Mineralsip kissaataa pillugu: Aaqqiagiissitsiniartarfimmi suliarinninnissamut tunngavissaqanngissoraara

Greenland Mineralsip Namminersorlutik Oqartussanik danskillu naalagaaffiannik aaqqiagiissitsiniartarfimmut suliarisassanngoqqullugit kissaateqarnera aatsitassanut inatsimmik ataqqinnittoqannginnerusoq, aatsitassanut naalakkersuisoq, Naaja H. Nathanielsen isumaqarpoq.

Inatsisartut nunatsinni uranitalimmik piiaanissamut inerteqquteqalernissamik aalajangerneranniit qaammatit sisamat qaangiuttullu aatsitassarsiortitseqatigiiffiup Australiamiunit pigineqartup Greenland Mineralsip Namminersorlutik Oqartussat danskillu naalagaaffiat aaqqiagiissitsiniartarfimmut suliarisassanngoqqullugit kissaateqarpoq.

Tamannalu aatsitassat pillugit naalakkersuisumut Naaja Nathanielsenimut uissuummisitsivoq.

- Aatsitassanut tunngasuni inatsisiliorneq nunatta 2010-mi akisussaaffigileraa, tamatumanilu aalajangiinerit nunatsinni eqqartuussivinnuinnaq suliassanngortinneqarsinnaasut, tassani allasimanera, piviusuummat isiginngitsuusaaraat isumaqarpunga, Nauja Nathanielsen oqarpoq.

Aatsitassanut inatsimmi paragraf 3 d-mi immikkoortoq 4-mi allassimasoqarpoq ima: ” Imm. 4.  Pissutsit Inatsisartut inatsisaanni pineqartunut ilaasut pillugit aalajangiineq taamaallaat eqqartuussivinnut Kalaallit Nunaanni aalajangiisinnaatitaasunut suliakkiissutigineqarsinnaavoq. Aalajangiineq eqqartuussivinnut suliakkiissutigineqartoq, Kalaallit Nunaanni Eqqartuussivinnut siulliullutik suliarinnittussanut, suliakkiissutigineqassaaq” issuaaneq naavoq.

Aaqqiagiinnginnermut suliaq sunaava

Aaqqiagiinnginnermut suliaq tassaavoq illuatungeriit isumaqatigiinngitssutaannik eqqartuussinermi aaqqiissut nalinginnaasoq avaqqullugu aalajangiisoqarneq. Uani eqqartuussisoqanngilaq, kisianni sammisami aalajangersimasumi immikkut ilisimasalik suliamut aalajangiisarpoq.


Aalajangiineq eqqartuussisarneq nalinginnaasoq assigalugu qullersanut ingerlateqqinneqarsinnaanngilaq, aalajangiinerlu taanaaginnassalluni.

 

Tamat suliami eqqartuussivimmi suliami tamanut ammasutulli paasissutissanut takunnissinnaanissamut periarfissaqanngikkajuttarput.

Tassalu imaappoq inatsit malillugu; illoqarfimmi eqqartuussisunit ingerlanneqartussaavoq.

Greenland Mineralsili qallunaat aaqqiagiissitsiniartarfiannut suliassanngortitsiniarami tamanna ataqqinngikkaa, Naaja H. Nathanielsen oqarpoq.

- Aatsitassarsiornermut tunngasut nunatta akisussaaffigigai Danmarkimilu eqqartuussivinni suliassaanatik nunatsinni eqqartuussiveqarfinni suliassaasut, Greenland Mineralsip ataqqinngikkaa isumaqarpunga.

AAMMA ATUARUK Greenland Minerals nunarput pillugu suliassamik aallartitsivoq

Taamaammat Danmarkimi aaqqqiagiisitsiniarluni eqqartuussiviup suliassaq una suliariumassanngikkaat, taassuma ilimasuutigaa.

- Aaqqiagiissitsiniartarfimmi suliarinninnissamut tunngavissaqanngissoraara.  Greenland Mineralsip nunatsinni aatsitassamik piiaanissamut akuersissummik tunineqarsinnaanerlutik, uranilu pillugu inatsimmit, Inatsisartuni aalajangiussaasumit, killiliiffigineqarnerlutik, Danmarkimi aaqqiagiissitsiniartarfimmut isummerfigeqquaat.  Uanga tamakkua atuuttut tamaasa eqqarsaatigalugit, suliassaq itigartitsissutigineqassasoraara, aatsitassanut naalakkersuisoq oqarpoq.

Greenland Mineralsip Kuannersuarni suliniummi piiaanissamut akuersissuteqarfigineqarnissaanut qinnuteqaataa Aatsitassanut Aqutsisoqarfimmi suliarineqarpoq.

Qinnuteqaat taanna aaqqiagiisitsiniartarfimmiluunniit suliarineqartussanngoraluarpat suliarineqaannassasoq, Naaja H. Nathanielsen aamma erseqqissaavoq.

KNR-ip Greenland Minerals suliamut atatillugu oqaaseqartinniarsaraa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl