Naalakkersuisoq: Danmarkimi inuiaqatigiinnut akuulersitsiniarnermi oqaatsit aporfiupput

- Kalaallit ilarpassui danskisut oqalussinnaanngillat, taamaammat Danmarkimut tikinniutaa Danmarkimi pisortat qanoq ingerlaaseqarnerat ataasiakkaanullu qanoq piumasaqaateqartoqarnera paasissallugu ajornakusoortitsisarput. Aammattaaq Danmarkimi pissutsit pillugit ilisimasakippallaarneq Danmarkimut nuunnermi ajornartorsiutitsisarpoq, Martha Lund Olsen taama oqarpoq.

Kalaallinut Danmarkimut nuuttartunut inuiaqatigiinnut akuulersitsiniarnermut immikkut aaqqissuussisoqarnissaa siunnersuutigaa, soorlu assersuutigalugu danskit oqaasiinik aallarterlaatut pikkorissaasoqartarluni kiisalu Danmarkimi pissutsit pillugit pikkorissaasoqartarluni

- Ataasiakkaat inuiaqatigiinnut akuulerniarlutik ikiorneqarnissaat ajornannginnerusariaqarpoq. Maannami ilarpassuisa sumut saaffiginnissanerlutik qanorlu ikiorneqarsinnaanerlutik nalusarpaat. Tamakkulu nalugaanni ikiorneqarnissaq ajornakusoorpoq.

Danskit isumaginninnermut ministeriata, ataatsimeersuarnermut aamma peqataasup, kalaallit ikiortariallit pillugit periusissaq 13,4 millionit koruuninik aningaasaliiffigineqarsimasoq maannalu piviusunngortinneqartussaaq isumalluarfigisupilussuuaa. Martha Lund Olsenili isumaqanngilaq periusissaq kisiat isumalluutigineqarsinnaassasoq.

- Naammassorinngilara, inuit pineqartut kommunini assigiinngitsuni suliniuteqarfigineqartariaqarsoraakka. Kalaallimik takkuttoqartillugu sullissisut ilisimasariaqarpaat suut naatsorsuutigisinnaassanerlugit. Isumaqarpunga ajortorsiutit pilerfiat tassaasoq danskerpassuit isumaqarmata kalaallit tamarmik danskisut oqalussinnaasut.

Martha Lund Olsenip aamma oqaatigaa Nunatsinni Danmarkimut nuunneq pillugu quppersagaliortoqarsimasoq, taannalu sapaatit-akunnerata tulliani naqiterneqareerpat agguaanneqartussaasoq.