Assi: Nauja Møller

Naalakkersuisoq avatangiisit pillugit immikkut suliniuteqalersoq

Pinngortitamut avatangiisinullu naalakkersuisup, Kalaallit Nunaat eqqiluinnerusoq pilersikkumallugu eqqagassalerinermut suliassaqarfimmi sanaartugassanut pilersaarut ukiunut qulinut tulliuttunut atuuttussaq saqqummiuppaa.

Ammaannartumik ikuallaasarneq EU-mit piumasaqaataasunit 2000-eriaammik avatangiisinut ajornartorsiortitsinerusartoq, eqqagassat ulorianartut imaanut avatangiisinullu mingutsitsisartut taavalu anartarfiit imaanut kuutsiinnarneqartarnerisa ajornartorsiutaanerat tassaapput Naalakkersuisut aaqqissuteqarfiginissaanut pilersaarutaat.

- Eqqagassalerinermut suliassaqarfimmi unammilligassat amerlasoorpassuupput ilungersunartuullutillu. Taamaattumik eqqagassalerinermut suliassaqarfimmi sanaartugassanut pilersaarut manna pisariaqarluinnarpoq, taamaalilluta Kalaallit Nunaat minguinnerusoq - avatangiisitsinnut peqqissutsitsinnullu iluaqutaasumik - pilersissinnaallutigu, pinngortitamut avatangiisinullu naalakkersuisoq Mala Høy Kúko taama oqarpoq.

Eqqagassalerinermut suliassaqarfimmi sanaartugassanut pilersaarut atuaruk

 

Kikkut tamarmik akisussaasuupput

- Tamaqqissaatta akisussaaffeqaratta. Meeraagaluarutta, inersimasuugaluarutta aamma utoqqaagaluarutta nunatta peqqinnissaani (saligaatsuunissaani, aaqq.) eqqagassalerineq eqqarsaatigalugu akisussaaffeqarpugut.

Mala Høy Kúko tusagassiortunut saqqummiussinerminimi tikilluaqqussutaa taama aallartippoq. Tassani eqqagassalerinermut suliassaqarfimmi sanaartugassanut pilersaarut ukiunut qulinut tulliuttunut atuuttussaq saqqummiuppaa, saqqummiussinerlu tunumiut oqaasii atorneqarput.

 

Suliniuteqarfissat sisamat
2014-imi aningaasaliissutit misilittakkallu tunngavigalugit pilersaarummi suliniuteqarfissat sisamat pingaarnersiorneqarput.

- Siullertut eqqagassat navianartut, avatangiisinik mingutsitsisartut. Aappaattut eqqaaviit tukallisutut taasinnaasavut, taakkua immikkoortitersinnaanissaat pingaartipparput. Pingajuattut anartarfilerinermi Kalaallit Nunatsinni annertoorsuarmik ajornartorsiorpugut. Peqqinnissaq eqqarsaatigalugu kiisalu aamma nappaataasinnaasunik tunillaasinnaasunik taakkua aallartitsisinnaammata, tamanna iliuuseqarfigineqartariaqarpoq. Sisamaattut ikuallaaviit mikisut aamma angisuut immikkoortissimavagut.

Aamma atuaruk Igitassanik immikkoortiterisalernissamut siunnersuut isorineqartoq

 

Kommunit taperserneqarput

Eqqagassalerinermut suliassaqarfiup annerpaartaa kommuninit isumagineqarpoq, pilersaarummilu nutaami kommunit naalakkersuisunit ikiorserneqarnissamik taperserneqarput - saniatigullu kommunit suliaqarfiup iluani pisussaaffimminnik suliaqaannassallutik, Mala Høy Kúko oqarpoq.

Aningaasaliissutissanut pilersaarutit tamakkiisut pigineqanngillat, Mala Høy Kúko oqarpoq. Tamanna aatsaat ersersinneqassaaq kommunit eqqagassalerinermut pilersaarutitik 2016-imi tunniussimalereerpatigik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat