Naalakkersuisoq: "Akuersaanngilluinnarneq IA-p 2011-mi atorunnaarsippaa"

Naalakkersuisup Jens-Erik Kirkegaardip naalakkersuisuusimasut appisaluuppai. Uranimut tunngatillugu tunngaviusumik aalajangiinissap tuavisaarutigineqarneranik Siumup isornartorsiornissaanut pissutissaqanngilaq, Kuupik Kleistimmi allaffeqarfiata 2011-mi Kujataani uranisiornissamut immikkut akuersissuteqareerpoq.

- Kuannersuit pillugit suliniut uranimik paasiniaanissamut 2011-mi akuersissummik tunineqarpoq, taamaammat oqaatigineqarsinnaavoq akuersaanngilluinnarneq Naalakkersuisut siuliinit IA-mit siuttuuffigineqartunit atorunnaarsinneqareersimasoq, Kirkegaard oqarpoq.

Imaassinnaavoq Siumup uranimik nioqquteqarnissaq pileriginerugaa, Kirkegaardip nassuerutigaa, partiili Inatsisartuni taperserneqarnissani aamma qulakkeereerpaa.

Aamma IA-p amerlanerussuteqarluni inissisimaneranit Aatsitassanullu naalakkersuisoqarfimmik aqunneqarallarneranit pitsaanerusumik inissisimavoq.

Soorliuna Kuupik Kleistip uranimik isorisaqarnera taamani saffiugassamik paasiniaanissamik unitsitsinngitsoq, taarsiullugulu Kuannersuarni misissuinissamut immikkut ittumik akuersissuteqartoqartoq?

- Inuit Ataqatigiit Inatsisartuni partiini taamani ikinnerussuteqarpoq. Naalakkersuisooqatigiinni misissuisitsinissamik aallartitsiniarluta taamaammat isumaqatigiippugut. Tamatumani aamma paaserusukkatsigu Kuannersuit sunik aatsitassaqarnersoq, naalakkersuisunut siulittaasuusimasoq Kuupik Kleist taama nassuiaavoq.

Inuit Ataqatigiit taamani uranimut akerliunermini Inatsisartuni tatineqarsimavoq.

Politikkikkut tatineqarnitta kingunerisaanik Aatsitassanut pisortaqarfik naggataatigut akuersiinnartariaqarsimavoq, Kuupik Kleist nassuiaavoq.

-Taamaammat uranip aamma misissorneqarnissaanut immikkut ittumik akuersissuteqartoqarpoq. Peqatigisaanilli aamma ingerlatsivinnut erseqqissumik nalunaarutigineqarpoq tamanna uranimut akuersaanngilluinnarnerup atorunnaarsinneqarnissaanik isumaqanngitsoq aammalu kingornatigut uranimik piiaanissamik akuersissummik tunineqarnissamik naatsorsuuteqarsinnaanermik isumaqanngitsoq.

Jens-Erik Kirkegaard nuannaarutigaa uranimut tunngatillugu Inatsisartuni tunngaviusumik aalajangiinissami innuttaasunik akuutitsinerunissaq angugamiuk.

 - Naalakkersuisuusugut nunatsinni innuttaasut Inatsisartuni sinniisaat pisussaaffilerpagut suliap matuma ingerlateqqinnissaanut, aatsitassanut naalakkersuisoq, Jens-Erik Kirkegaard oqarpoq.

Uranimut naaggaarluinnarnerup taamaatinneqarnissaanik inatsisartut aalajangernissaannik taassuma siunnersuutini ullumi saqqummiutissaavaa. Inatsisartut siunersuummut akuersillutik ullumi taasisinnaapput, ilimanarneruvorli, siunnersuut ataatsimiititaliani suliarineqaqqaassasoq, Inatsisartullu ataatsimiittarfiani oktobarip 24-ani aatsaat taasissutigineqarluni.