VIDEO Naalakkersuisoq aaqqiissutissamik pitsaanerusumik ujartuiniarpoq

Knud Rasmussenip Højskoliata naqinnernik ilisarsisinnaanngitsunik ilinniartitsisarunnaarnera ilungersunartuusoq ilinniartitaanermut naalakkersuisup Nivi Olsenip nalilerpaa.
aggustip 05-at 2015 12:00

Ilinniartitsisunik amerlanerusunik højskolip pisariaqartitsinerata Namminersorlutik Oqartussat aningaasaliisinnaannginnerata kingunerisaanik Knud Rasmussenip Højskoliani naqinnernik ilisarsisinnaanngitsut atuartinneqartarnerat taamaatiinnarniartariaqalerpoq.

Aamma atuaruk  Naqinnernik ilisarsisinnaanngitsut Sisimiuni atuartinneqassaarput

- Atuarfiup atorfissaqartinneqarnera malillugu aningaasanik pisariaqartitsineq peqqutigalugu taamak pisoqartariaqarnera tusarlugu assut uggornarpoq. Aamma suliassaavoq piaartumik qulaajarlugu naammassisassaq, Ilinniartitaanermut naalakkersuisoq Nivi Olsen oqarpoq.

Aamma atuaruk Naqinnernik ilisarinnissinnaanngitsunut atuartitsinissamut soqutiginnipput

Knud Rasmussenip Højskoliata siulersuisui nalunaaruteqarput, aningaasanik pisariaqartitsineq pissutigalugu naqinnernik ilisarsisinnaanngitsunut ilinniartitsisarneq taamaatiinnarneqartariaqalersoq.

- Aningaasakilliornerup atuartitsinermilu atortunik amigaateqarneq unammillernartuusimavoq, Knud Rasmussenip Højkoliani pisortaq Lise Lennert Olsen oqarpoq.

 

Oqummik eqqugaapput

Højskolip oqummik eqqugaanerata kingunerisaanik sinittarfiit ilinniartunit avataaneersunit atorneqartartut 50-iusut affaat sinnillit matuneqartariaqarsimallutik.

Pisariaqartitsineq annertugaluaqisoq naqinnernik ilisarsisinnaanngitsut atuartinneqartarnerat taamaatiinnarneqartariaqarsimavoq. Ukioq mannaannaq qinnuteqartut 49-uugaluarput.

Taamatullu pisoqarnera højskolimut kingunerluuteqarpoq. Naak Namminersorlutik Oqartussanit ukiumut 6 millionit koruuninik taperneqartaraluarlutik ilinniartut ikilerujussuarnerisa kinguneranik aningaasaliissutit ikilineqartariaqarsimapput. Tassami Namminersorlutik Oqartussat ilinniartumut ataatsimut ukiumut 300.000 koruunit akiliutigisarpaat. Namminersorlutik Oqartussat aningaasaliisarnerisa saniatigut kommuunit ilinniartullu akileeqataasarput.

Aningaasalli atorfissaqartitat naammanngillat.

- Aningaasalli naammanngillat. Taamaammat højskolip siulersuisui Namminersorlutik Oqartussanut ilinniartut akiliutigisartagaat qaffaavigiumallugit qinnuteqarsimapput, Højskolip pisortaa Lise Lennert Olsen oqarpoq.

Qinnuteqaatertillu suli akissutisisimanngitsoq højskolip pisortaata oqaatigaa.

 

Aqqutissanik ujartuiniarpoq

Ilinniartitaanermullu naalakkersuisoq aaqqiissutissamik ujartuiniarpoq.

- Massakkut eqqungaasut ajunnginnerpaamik sullinniarutsigit aaqqiissut suna aqqutaasinnaanersoq ujartussavarput. Periarfissaqarpoq inatsisitigut kommunit tapersiisinnaanerat, taannalu orniginarnerpaatut aaqqiissutitut ujartussavara, Ilinniartitaanermut naalakkersuisoq Nivi Olsen taama oqarpoq.

Kommuneqarfik Sermersuumi atuartitaanermut immikkoortortaqarfimmi pisortaq Søren Valbak isumaqataavoq.

- Naqinnernik ilisarsisinnanngitsunik ilisimasallit peqatigalutigit ataatsimoorluta suliniuteqartariaqarpugut. Soorlu Inerisaavik assigisaaluunniit ikioqatiseralugit qanoq pitsaanerusumik atugassaqartitsisinnaanerput ujartorlugu, Kommuneqarfik Sermersuumi atuartitaanermut immikkoortortaqarfimmi pisortaq Søren Valbak oqarpoq.