Naalakkersuisooqatigilernissaannut akuersaarpoq
Kenyami præsidenti, Mwai Kibaki, illuatungiliuttut naalakkersuisooqatigilernissaannut akuersaarpoq.
Allattoq Mads Lynge
Illuatungiliuttut Kibakimik manna tikillugu oqaloqatiginnikkusunngikkaluarput, præsidentimut decembarip ulluisa 27-anni qinersinermi Kibaki pinerlussimasutut pasillugu.
- Naalakkersuisunngortitakka inissippata Kenyamiut amerlanerpaat sinniisorissavaat, Kibaki nalunaarummini oqarpoq.
Kenyalli kippasinnerusortaani illuatungiliuttut akornanni illoqarfiillu pingaarnersaanni Nairobimi pissakilliortut najugaqarfianni perulluliortoqarsimavoq, tamaani qinersinerup nalaani peqquserlussimasutut pasineqaraluarluni Kibaki naalakkersuisunngortikkusutamini ministerissatut qinigaqareersimanera isorineqarpoq.