Naalakkersuisooqatigiit mittarfiliortiterniarput

Ilulissani mittarfiup tallineqarnerata saniatigut illoqarfinni arlalinni mittarfiit sanaartorneqassasut, Naalakkersuisut isumaqatigiissutaanni allaqqavoq, taakkualu millionerpassuarnik naleqassapput.

Ilulissani mittarfiup tallineqarnissaa Naalakkersuisooqatigiit isumaqatigiissutaanni allaqqavoq. Taasumalu aningaasalersorneqarnissaa aappaagumiit aallartinneqassasoq aalajangerneqarsimavoq. Nuummi mittarfiup tallineqarnisssaa annertunerusumik eqqaaneqanngilaq, taamaallaalli eqqaaneqarpoq Nuup ineriartornera qanoq ingerlanneqassanersoq kommune suleqatigalugu misissorneqassasoq.

Illoqarfiit miinnerit arlallit, mittarfinnik naannernik sanaartorfigineqarnissaat pillugit pilersaarusiortoqassaaq.

Ilulissani mittarfik 1799 miiterinut tallineqarpat, timmisartut Atlantikoq qulaallugu timmisartut toqqaannartumik Ilulissanut missinnaalissapput.

Illoqarfinni minnerni Mittarfiliortiternissani siunertaavoq timmisartut 19-nik ilaasoqarsinnaasut miffigisinnaasaanik mittarfinnik sanaartortoqassasoq. Mittarfiillu sanaartortoqalerpata angallannermut nalunaarusiami 2004-meersumi akit allaqqasut malillugit, mittarfiit ataasiakkaat sanaartorneqarini 45 mio. kr.-niit 67 mio.kr.-nit tungaannut akeqassasut allaaserineqarpoq.

Mittarfinnik naatsunik sanaartornissami pilersaarusiortoqarnissaani Naalakkersuisooqatigiit isumaqatigiissutaani illoqarfiit ilaatigut makkua eqqaaneqarput:

Nanortalik, Qaqortoq, Narsaq, Paamiut, Qasigiannguit Qeqertarsuarlu. Illoqarfiit taakkua mittarfinnik sanaartorfigineqalerpata qanorpiaq aningaasanngorlugu akeqassanersut suli ilisimaneqanngilaq, qularnanngilarli millionit 100-likkaat arlallit mittarfiliortiternernut atorneqarumaatut.