Naalakkersuisooqatigiit isumaqatiginninniutigissavaat
Siumut ataatsimeersuarneranni aalisarnerup inuiaqatigiinnut annertunerusumik tunniussisalernissaanik anguniagassatut inissiineq Augusta Salling, Atassut sinnerlugu inatsisartut aningaasaqarnermut ataatsimiititaliaani siulittaasumit aningaasarsiornermullu oqaaseqartartuusumit isummerfigineqarpoq:-Pisat akitsuusersorneqalernissaat, taanna Atassumminngaanniit isumaqatiginngilarput, aamma taanna naalakkersuisooqatitta nalunngilluinnarpaat.
Aalisarnerup aningaasartuutinik nutaanik artukkerneqarnissaa Atassutip nalakkersuinikkut anguniagaannut akerliulluinnarpoq, Siumulli ataatsimeersuarnerani anguniassatut oqaatigineqartoq isumaqataaffigineqartoq tassaavoq akit assigiikkunnaarnerat, tassungalu tunngatillugu iliuuserilissamaakkaminnik Augusta Salling erseqqissaavoq, oqarluni:-Atassumminngaanniit inatsisartut ataatsimiinnissaannut upernaakkut, siunnersuutigaarput misissuilluartoqassasoq sukkasuumik suliarineqarluni eqquinerlunneq taanna qanoq ililluni, qanoq annertutiginersoq qanorlu aaqqeriarneqarsinnaanersoq iliortoqarsinnaanersoq eqqarsaatigalugu.
2009-imut aningaasanut inatsissaq Siumut ataatsimeersuarerata kingorna annertuumik sunnerneqartussaavoq, tassungalu tunngatillugu Augusta Salling imak naggasiivoq:-Soorunami pissangananngitsuunngillat uani apeqqutit annertuut eqqartorneqartussaamata, kisianni naatsorsuutigilluinnarpara politikeritut, partiit taakku marluk politikkikkut nammineq anguniakkatik pingaartitatik aamma ataqqillutik illua’tungeriillutik pitsaasumik angusaqarumaartut.
