Naalakkersuisooqatigiit isumaqatigiissutertik nutarterpaat
Naalakkersuisooqatigiit Siumut Inuit Ataqatigiillu isumaqatigiissutigisimasamik tapissatut isumaqatigiissutigisaat suliaralugu inereerpaat ullunilu qaninnerni atsiussallugu, radioavisimit attaveqarfivut ilisimatitsipput.
Isumaqatigiissutissaq taanna inerniariarlugu tamarmik immikkut piareersalerput ukiumoortumik partiitut ataatsimeersuartitsinissaminnut – taakkulu tamarmik pereersimassapput qaammatit pingasut qaanguppata kommuninut qinersineqartinnagu.
IA qaammatip matuma naajartornera ataatsimeersuassaq Siumullu februaarip qeqqata missaani.
Siumukkormiut siulittaasussarsiornissaat qitiuvoq. Siulittaasoq Hans Enoksen qinigassanngorteqqissanersoq suli nalunarpoq, qinigassanngortissagunilu unammillertereratarsinnaavaa partiiminnit folketingimut ilaasortaatitartik Lars-Emil Johansen Siumup Nuummi siulittaasua.
Lars-Emil Johansen ullumi oqarpoq Siumumut tamarmut siulittaasunngorniassanerluni suli isummerfiginagu, folketingimili suliani suli aallunnerugini.
- Imminuinnaq oqaloqatigigallarpunga, Lars-Emil Johansen radioavisimut oqarpoq.