Naalakkersuisooqatigiit isumaqatigiissutertik atsiorpaat
Naalakkersuisooqatigiit isumaqatigiissutaannut tapiliussaq ualeq manna atsiorneqarpoq Siumup siulittaasuanit Hans Enoksen-mit IA-llu siulittaasuanit Josef Motzfeldtimit.
Isumaqatigiissummi pingaartinneqarput ilaqutariit meerartallit, tassanilu taaneqarsimasut ilagaat, meerartaarsimanermi sulinngiffeqartarnerup sivitsorneqarnissaa. Meerartaarsimasut maannakkut sapaatit akunnerini 24-ni sulinngiffeqarsinnaaneri sapaatit akunnerinut 35-nut sivitsorneqassapput, sivitsuinissarlu ukiumut 7-10 million koruunit tungaanut naleqassaaq.
Meeqqat ukiumut 1000 koruuninik ileqqaarunneqarnissaanut aningaasartuutissat ukiumut 18-19 million koruunit tungaanut naleqassapput.
Meeqqerivinni inissanik utaqqisut ikilitinniarneqarnissaanut aningaasat 7 million koruunit atorneqassapput.
Inuit Ataqatigiit anguniagaasa ilaat, tassa akissarsiaqarnerit akileraarnerusalernissaat isumaqatigiissummi eqqaaneqanngilaq.
Isumaqatigiissummi siunniunneqarpoq inissiat 380-it ukiumut sanaartorneqartalernissaat.
Mittarfiliortiternissat pineqarnerini Ilulissat mittarfiata tallineqarnissaa siunniunneqarpoq, illoqarfinnilu assigiinngitsuni mittarfiliortiternissat makkunani pissapput: Nanortalik, Qaqortoq, Narsaq, Paamiut, Qasigiannguit Qeqertarsuarlu.
