Naalakkersuisooqatigiit isumaqatigiissutaat

novembarip 25-at 2005 16:48

Namminersornerunerup oqaluttuarisaanerani partiit pingasut Siumut Atassut Inuit Ataqatigiillu naalakkersuisooqatigiinnissamik isumaqatigissutaat qanoq imaqarpa?

Naalakkersuisoqaatigiilersut ilaatigut pingaarnertut anguniagassamittut atsioqatigiissutigaat kalaallit inuiaqatigiinni oqartussaaqataanerat eqqarsaatigalugu naligiinnerusunik atugassaqalernissaq.

Nunatta aningaasaqarnikkut suliffissaqarniarnikkut politikkikkullu imminut napatissinnaajartornissaa kiisalu aalisarnermi pisortallu allaffeqarfiini kalaallit ilinniagaqarsimasut atorluarneqarnerulernissaat aamma anguniagassanut ilannguneqarsimavoq.

Pisortat suliffeqarfiutaanni allaffeqarfinni kalaallit oqaasiisa pingaarnertut inissinneqarnissaat anguniagaavortaaq.

Allaffissornerujusuup annikilllisarneqarnissaa kiisalu kalaallisuinnaq oqaasillit ilinniartitaanikkut periarfissarissaarnerulernissaat suliniutissanut ilaapput.

Meeqqanut tunngatillugu partiit naalakkersuisunngortitsisut suliniutigerusutaat tamangajavimmik isumaqatigiissutigiissummiipput.

Meeqqanut checki ilanngullugu. Taanna aappaagu Inatsisartuni suliarineqareeruni 2007-imi atulersinniarneqarpoq.

Atassutip siulittaasua Finn Karlsen oqarpoq ukiuni tallimani tulliuttuni sanaartornerup pilersaarusiorneqarnissaa Atassummit immikkut anguniagaasoq. Tamatuma saniatigut isumaqatigiissummi meeqqat ilaqutariillu atugaannut, ilinniartitaanermut aalisarnermullu tunngasunut Atassut aamma naqissuseeqataavoq.

Innaallagissap erngullu akiisa assigiikkunnaarsinneqarnerata kingunerisassai pillugit suleqatigiissitaq ataqatigiissaarisutut inissisimasoq misissuisinneqassaaq. Taanna akit assigiikkunnaarnerisa allaffissornikkut suliarineqarnissaannik siunnersuuteqartussaassaaq.