Naalakkersuisooqatigiit ilaqutariit pitsanngorsarusuppaat
Naalakkersuisooqatigiit naalakkersuisooqatigiinnerminni tunngavissaminnik nutaanik immikkoortunik 47-nik isumaqatigiissuteqarput, aatsaalli juullereerpat atsiussavaat.
Naalakkersuisooqatigiit aappagumut qinersinissattaluunniit tungaanut politikkissartik isumaqatigiissutigaat.
Oqaatigineqareersutut inunnik isumaginninnermut tunngasuni isumaqatigiissummi nutarteripput.
Meeqqat pingitsooratik nakkutigineqarnissaannik qulakkeerinnittarnissaq isumaqatigiissutigaat.
Sulisinnaajunnaartut iliuuseqarfiginiarlugit ukiumut 50 milliuuninik amerlanernik immikkoortitsisalernissaq kissaatigineqarpoq.
Naalakkersuisooqatigiit aamma kissaatigaat inuttaasut inuiaqatigiinni pisussaaffeqartariaqarnerat, soorlu meeqqat atuarfianit naammassereernerup kingorna pingitsoorani ilinniagaqarsimanissaq, naalakkersuisummi isumaqarput ilinniakkaminnik naammassisartut inuusuttut amerlassusiannut naapertorlugu ikippallaarujussuartut.
Meeqqat atuarfiini nalileeriatsit nutaat atulersinniarneqarput, taamaalilluni atuartoq qanoq ingerlanersoq naliliiffigineqarsinnaaniassammat.
Aalisarnermut politikkissamik nutaamik sanasoqarnissaa aamma piumasarineqalerpoq, Islandi Savalimmiullu peqatigalugit aalisarnermut politikkiliornissaq siunertarineqassammat.
