Naalakkersuisooqatigiit eqqissiiminerorusullutik oqaloqatigiipput
Partiit gruppikkaarlutik arfininngormat ataatsimeeqatigiimmata naalakkersuisooqatigiit akornanni eqqissiviilliornerup qaangerniarneqarnissaa anguniarneqalerporlusooq.
Taama aatsaat ataatsimeeqatigiittoqarpoq, Naalakkersuisullu akornanni eqqissiviilliortoqarnera malisungaannarlugu ataatsimiinneq pilluni.
Atassutip siulittaasua, Finn Karlsen, eqqissiviilliornernut peqqutaavoq. Great Greenlandip pisortaa pillugu Finn Karlsenip sapaatip-akunnerani kingullermi oqaaseqarnera, Naalakkersuisut immikkut ataatsimiittariaqarnerannik kinguneqarpoq. Finn Karlsenip oqaaseqarnerata aamma kinguneraa, Naalakkersuisut siulittaasuata, Hans Enoksenip, allakkatigut utoqqatsertariaqarnera.
Naalakkersuisooqatigiit akornanni eqqissiiminissaq sapaatip-akunnerata naanerani ataatsimiinnermi anguniarneqarpoq. Ataatsimeeqatigiinnerni ullormut oqaluuserisassat atorneqarneq ajorput, taamatullu aamma imaqarniliortoqartarani.
Peqataasarput illuatungiliuttuni naalakkersuisunut ilaasortat aamma partiit Inatsisartuni ilaasortaatitaat.
Ataasinngorpat tulliani ataatsimeeqqittoqarnissaa pilersaarutaavoq.
