Politikki

QULAARPAA Naalakkersuisooqatigiit anguniagaat pingaarnerit suuppat?

Qulaarpaa unnugu kingumut aallakaatitseqqittalissaaq. Tamannalu aallarnerlugu, naalakkersuisooqatigiinnissamik isumaqatigiissummi nerisorsuuterpassuit arlaat sorleq siulliullkugu piviusunngortinneqassanersoq oqallisigineqassaaq.

Knud Kristiansen, Kim Kielsen & Anda Uldum

Allattoq Walter Turnowsky

januaarip 29-at 2015 11:15

Nutserisoq Simon Uldum -

Naalakkersuisooqatigiinnissamik isumaqatigiissut decembarip tallimaani atsioqatigiissutigineqartoq naalakkersuinikkut suliniutissanik Naalakkersuisut ingerlakkusutaannik arlalinnik imaqarpoq. Taakkununnga ilaapput mittarfiit nutaat, angerlarsimaffimmi akeqanngitsumik ikiorteqarneq, napparsimmavik nutaaq, ivigaaraasanik arsaattarfiit kiisalu ingerlatseqatigiiffinnut akileraarut appasinnerusoq. Siunnersuutit ikinnerpaamik 25-t nunatta karsianut aningaasartuutinik nutaanik pilersitsisussat pineqarput.

Sukannersumik pingaarnersiuisoqassaaq

Peqatigitillugu nunatta aningaasaqarnera ilungersunartumik inissisimavoq, siornamut aningaasanut inatsit 300 millionit koruunit missaannik amigartooruteqarfiuvoq.

- Politikerit sukannersumik pingaarnersiuisariaqalerput.

Aamma atuaruk GA: Isumaqatigiissut akisuallaassaaq

- Neriorsuutit taama amerlatigisut ataatsikkut piviusunngortinneqarsinnaannginnerat erseqqilluinnarpoq, Nunatta Aningaasaqarneranut Siunnersuisooqatigiit siulittaasuat, professor Torben M. Andersen, taama oqarpoq.

Neriorsuuterpassuit qanorpiaq naleqarnissaat oqaatigisinnaanngilaara, aningaasarpassuillu pineqartut erseqqissaatigalugu.

Aaqqissuusseqqinnerit ukiut arlallit qaangiunneri aatsaat sunniuteqartarput

Naalakkersuisooqatigiinnissamilli isumaqatigiissut naalakkersuinikkut neriorsuutigineqartut aningaasalersorneqarnissaannut pilersaarutinik aamma imaqarpoq. Nutaanik isertitassarsiortoqassaaq, pingaartumilli aaqqissuusseqqinerit arlallit ingerlanneqarnerisigut nunatta karsia oqilisaanniarneqarpoq. Nunatta karsia amigartooruteqarani ingerlassappat aaqqissuusseqqinnerit taakku pisariaqarluinnartut Aningaasaqarnermut Siunnersuisooqatigiit ukiuni arlaqalersuni ersarissumik tikkuartorsimavaat.

- Aaqqissuusseqqinnerit taakku ingerlanneqarniarnerit pingaaruteqarluni eqqortumik iliorneruvoq. Aaqqissuusseqqinnerilli taama ittut ukiut arlallit qaangiukkaangata aatsaat sunniuteqarsinnaanerat eqummaffigineqartariaqarpoq, Torben M. Andersen taama oqarpoq.

Naalakkersuinut ilaasortat illuatungiliuttuneersullu suliassanik pingaarnersiuinissaq Qulaarpaami oqallisigissavaat. Suut pingaarneruppat, aamma aningaasanut inatsisip nammaqatigiissinniarnissaa qanoq qulakkeerneqassava.

Aallakaatitassiaq KNR TV-kkut aqagu unnukkut, kalaallisut nal. 19.30, danskisullu nal. 20.30, aallakaatinneqassaaq.