Naalakkersuisooqatigiit akerleriinnerat Siumup isornartorsiorpaa

Aatsitassanik uranitalinnik piiaasoqannginnissa Naalakkersuisut siulittaasuata Kuupik Kleistip Inatsisartuni taasissutigitinngilaa. Tamanna pillugu Siumukkormiut oqarput taasinissamik amerlanerussuteqartoqaraluartoq, taamaattumillu suleriaatsimik ataqqinninnginneq pinngortoq, Siumup politikkikkut oqaaseqartartua, Karl Lyberth oqarpoq.

Uranitalinnik piiaannginnissamik inassuteqarsimaneq atorunnaarsinneqarsinnaagaluartoq, Demokraatit, Siumukkut aammalu Atassutikkut taasineri tamaasa ataatsimut katikkaanni. Aammalumi taamaattariaqaraluartoq, Siumumit oqaatigineqarpoq.

Politikkimik ingerlatsineq sumulluunnit attuumassuteqartoq amerlanerussuteqartut oqariartuutaannik toqqammaveqartussaasoq, Karl Lyberth tusagassiutinut allappoq.

Apeqqut qinigaaffimmi matumani misissorneqarluni qaqeqqinneqarumaartoq aammalu aatsitassat pillugit inatsit misissorneqarumaartoq. Naalakkersuisut siulittaasuat Kuupik Kleist ippassaq oqarpoq.

Taamatut oqarnera allamut saasaarinerusoq Siumut isumaqarpoq:

- Aatsitassanik uranitalinnik piiaannginnissaq inatsisaanngilaq aammalu aalajangersakkanut attuumassuteqarani. Politikkikkut aalajangiinerinnaavoq, Karl Lyberth oqarpoq, eqqaamaqqullugulu aalajangiineq 1988-mili pimmat.

Aatsitassanik piiaanermi aatsitassat uranitaqartut appasinnerpaaffilerneqarnissaat Siumup Inatsisartut aappaagu ataatsimeeqqilerpata sukataarunniarpaa.

Siunnersuut maanna aappassaaneerneqareerluni aappaagumut pingajussaaneerneqartussaavoq. Appasinnerpaaffiliinikkut sulisartut amerlinissaat Siumup naatsorsuutigaa , taamaalillunilu nunatsinnut aningaasanik isaatitsissutaanerulissalluni.

Tamanna akerlilerlugu, Kuupik Kleist oqarpoq, maanna aatsitassarsiorneq ingerlalluartoq, naak aatsitassat uranitallit piiarneqanngikkaluartut.