Naalakkersuisooqatigiit ajornartorsiorput

oktobarip 06-at 2006 06:10

Inatsisartut Aningaasaqarnermut Ataatsimiititaliaani siulittaasoq Atassummeersoq Ellen Christoffersen ippassaq unnukkut Qanoruumi oqarpoq

Arctic Umiaq Linep ingerlaqqilersinnaanissaa akissaqartinneqartariaqartoq, tamannalu naalakkersuisooqatigiinnermik maanna ajornartorsiortitsilerpoq. Naalakkersuisut siulittaasuat Hans Enoksen oqarpoq taama oqaaseqarneq akuersaarsinnaanngilluinnarini.

Tamanna pillugu partiit naalakkersuisooqataasut Inuit Ataqatigiit Atassutillu siulittaasui Josef Motzfeldt aamma Finn Karlsen Naalakkersuisut siulittaasuata ullaaq arfineq-pingasuniit ataatsimeeqatigilerpai.

- Inatsisartuni ilaasortat Ataatsimiititaliallu sinnerlugit Naalakkersuisoqatigiit avaqqullugit oqaaseqartarnerat aningasarpassuarnillu oqaaseqaqatttaarnerat akisussaassuseqanngilluinnartumik iliornertut nalilerpara taamalu ingerlanerat akueriinnarsinnaajunnaarpara, Enoksen oqarpoq.

Naalakkersuisooqatigiinneq ataannassappat, Naalakkersuisut avaqqullugit namminneerlutik oqaaseqartartut Atassutip siulittaasuata sakkortuumik unitsittariaqarai Hans Enoksen radioavisimut oqarpoq.

Aningaasaqarnermut ataatsimiititaliami siulittaasup Ellen Christoffersenip ippassaq Qanoruumi oqaaseqarnera Atassummit illersorneqassappat naalakkersuisooqatigiinneq nalilersorneqartariaqalissasoq Hans Enoksen oqarpoq.

- Innutaasunut iluareqqusaarluni oqaluttoqarsinnaanngilaq ilisimallugu karsi imaqqanngitsoq. Karsi imaqanngitsoq pinnguareqqinneqarsinnaanngilaq, 700 millioni koruunit tunganut amigartoortussaavugut, taamaattumik Aningaasaqarnermut Ataatsimiititaliap siulittaassuata taamatut oqaaseqarnera akuersaarneqarsinnaangilluinnarpoq, Naalakkersuisut siulittaasuat erseqqissaavoq.

Atassutikkut manngertitaassappata naalakkerisuisooqatigiinneq nalilersoqqittariaqalissasoq, qinersisoqarnissaali pilersaarutiginngikkini Hans Enoksenip erseqqisaatigaa.