Naalakkersuisooqatigiit ajornartorsiorput
Aalisarnermut Piniarnermullu Naalakkersuisup Finn Karlsenip Kalaallit Nunaanni Sulisitsisut Peqatigiiffiannit politiinut unnerlutigineqarnera Naalakkersuisut ullaap tungaani immikkut ittumik ataatsimiissutigaat, Inuit Ataqatigiit naalakkersuisooqataasut immikkut ittumik ataatsimiinnissamik piumasaqareersullu.
GA-p unnerluutiginninnera pinerluttaalisitsinermut inatsimmi paragraf 71-imi immikkoortoq siullermik unioqqutitsisimanermik imaqarpoq, tassa Great Greenlandip pisortaanut Michael Nielsenimut atatillugu Finn Karlsenimit ippassaq oqaatigineqarpoq Michael Nielsen illussaminik sanatitsisimanerminut atatillugu suliariumannittussarsiuussisarnermut inatsit avaqqullugu iliuuseqarsimammat Namminersornerullutik Oqartussat pisumik misissuinissaata nalaani suliunnaarallartinneqassasoq. Pisoq tamanna Naalakkersuisooqatigiinnermut aalassatsitsivoq. IA-p siulittaasua Aningaasaqarnermullu Naalakkersuisoq Josef Motzfeldt oqarpoq naalakkersuisooqatigiit tamarmiusut tusarniaqqaarnagit Finn Karlsen oqaaseqarlunilu iliuuseqarsimasoq. Josef Motzfeldt oqarpoq:
- Ullut kingulliit pisimasut nalilersussavagut, taavalu misissuinissamut tunngasut. Suliassat suut misissorneqassanersut nalilersussavarput. Ulluni kingullerni pisimasut, suut qanga oqaatigineqarsimanersut ilumullu issuaanerit ilumoornersut tamakku tamaasa misissorneqassapput.
Naalakkersuisooqatigiittoqalermalli pisoqaqattaarpoq naalakkersuisooqatigiit allorassaaqatigiippallaannginnerannik takutitsisunik massakkullu pisoq eqqarsaatigalugu IAp siulittaasua naammagittaannassanersoq aperaarput, akivoq:
-Naalakkersuisuni sulineq uppernarsaatissaqarluni suliassaammat erseqqissaatigineqartariaqartoq taqqamani oqaatigaara. Tusatsiakkat najoqqutaralugit Naalakkersuisut sulisinnaanngillat. Naalakkersuisut aalajangiineri tarmarmik uppernarsaatissanik toqqammaveqarlutillu suliarineqartussaapput.
Finn Karlsenip naalakkersuisuni ilaasortaaginnarnissaa Josef Motzfeldtip naliliiffigaa:
Inuit Ataqatigiit kisimik aalajangiisussaanngillat, Naalakkersuisut Siulittaasuata naalakkersuisooqatigiillu siuttuisa taanna oqaloqatigiinnerminni aalajangersinnaavaat. IA-mi isumarput massakkut oqaatigisinnaanngilara Inuit Ataqatigiit ataatsimeeqqittussaammata. Kisianni sulisitsisut tunniussinerminni toqqammavii massakkut misissugassaammata oqaaseqaqqissinnaanngilanga.
Naalakkersuisooqatigiit siuttui ullup ingerlanerani naapissapput.
Aningaasaqarnermut Naalakkersuisup Josef Motzfeldtip aamma erseqqissaatigaa naalakkersuisooqatigiit isumaqatigiissutigigaat piginneqatigiiffinnut Namminersornerullutik Oqartussat piginneqataaffigisaannut piginnittut sinnerlugit atassuteqarneq Naalakkersuisut Siulittaasuata akisussaaffeqarfianiimmat Namminersornerullutik Oqartussat piginneqataaffigisaanni aqutsisunik suliunnaarsitsinissamut naalakkersuisuni ilaasortat ataasiakkaat piginnaatinneqanngitsut. Suliunnaarsitsinernut atatillugu piginneqatigiiffiit siulersuisui aalajangiisartuullutillu akisussaaffilerneqarnikuummata.
Naalakkersuisooqatigiit ataatsimiinnerat sioqqullugu Josef Motzfeldtip tikkuarpaa qinikkat eqqartuussiviit sinnerlugit aalajangiinissamut piginnaatinneqanngitsut.
