Lars-Emil Johansen: Naalakkersuisooqatigiinniannginneq periarfissanik mattussisarpoq
Sverigimi qinersinermit qaammatit sisamat qaangiutereersullu Stefan Löfven statsministerinngortussanngorpoq, toqqaanissammi tungaanut partiit imminnut naaperiarneq ajuleraluarput
- Qinersinissaq sioqqullugu partiit amerlaqisut Sverigemi aalajangersimammata partii aalajangersimasoq naalakkersuisunik pilersitseqatigiinngilluinnassallugu aamma tamanna misilereersimavarput nunatsinni 2009-mi Inuit Ataqatigiit Siumut naalakkersuisooqatiginngilluinnassallugu qinersinissaq sioqqullugu nalunaarmata. Taamaattoqartillugu qinersisartut aalajangernissaat soorlu sioqquteriarlugu aalajangersaareerneq periarfissanik assigiinngitsunik mattussisarpoq, Lars- Emil Johansen oqarpoq.
AAMMA ATUARUK Stefan Löfven statsministerissatut Riksdagenimi itigartitsissutigineqartoq
Partiit imminnut mattutereertarnerat ajornartorsiutinik pilersitsisartoq Lars-Emil Johansen isumaqarpoq.
- Kisianni tassa sivisoqaaq aamma nuna naalakkersuisoqarani ukiup affangajaa ingerlasoq sivisoqaaq, atorfillit aqutsinerat annerusumik tassani pisarmat, taamaalilluni aamma demokratiskimik ajornartorsiutitaqarpoq inuit sinniisaannik toqqaannartumik siuttoqarnani taama sivisutigisumik ingerlatsineq.
- Qinersinissaq sioqqullugu mattusseriivittarneq taanna isumaqarpunga ajornartorsiutinik pilersitsisartoq tassami partiit namminissarsiorlutik kikkut suleqatiumanerlugit suleqatiginiarnagilluunniit aalajangereernissaat qinersisartut aalajangernerannik killilersueriarneruvoq, qinersisartut aalajangernerat qanorluunniit nuannarineqanngitsigigaluarpat partiit qinersisartunit amerlasuunit tapersersorneqarpata taava aamma sunniuteqarnissamut mattunneqarsinnaanngillat, uanga isumaga malillugu, Lars-Emil Johansen oqarpoq.
Sverigemi statsiministerinngortup toqqarneqarnissaata tungaanut Riksdagenimi oqaaseqartartoq qitiulluinnarpoq
- Kisianni aamma imaannaanavianngilaq, tassaniilluni naalakkersuisunik pilersitseriaraluarnerit amerlasuut ajutoortut nikallujuinnartorujussuussaaq.
Inatsisartuni siulitaasuusimasoq aamma Naalakkersuisunut siulittaasuusimasoq Lars- Emil Johansen Sverigimi politikkikkut pisut pillugit naliliilluni oqarpoq.
AAMMA ATUARUK Stefan Löfven Sverigemi statsministeritut qinigaaqqittoq
