Naalakkersuisooqatigiinnermi tunuartut arfinilissaat

Inatsisartunut ukioq 2002-mi decembarimi qinersisoqarmalli, naalakkersuisunut ilaasortat arfinilissaat ullumi tunuarpoq, Rasmus Frederiksen aalisarnermut naalakkersuisutut tunuarmat.

Tunuarnerit amerlanersaat partiip Siumup aamma Inuit Ataqatigiit naalakkersuisooqatigiinneranni pisarsimapput. Taakku 2003-mi septembarimi naalakkersuisooqatigiinnissamik isumaqatigiissuteqarput.

Siulliulluni naalakkersuisuujunnaarpoq Siumumeersoq Ruth Heilmann, ilaqutariinnermut naalakkersuisussatut toqqagaaqqinngitsoorami.

Naalakkersuisooqatigiit tulliuttut sivikitsuinnarmik atareersullu Siumumeersoq Mikael Petersen decembarip qaammataani 2003-mi ineqarnermut attaveqarnermullu naalakkersuisutut tunuartariaqalerpoq, imigassartorsimatilluni biilersimasutut tigusaanermi kingorna.

Naalakkersuisutut tunuarniuteqarnermi saniatigut, Mikael Petersen Siumumi siulittaasup tulliatut tunuarpoq, taamanilu ima naliliivoq:

- Isumaqarpunga pissusissamisoortoq taamatut alloriarnera, kingunissaalu nammassavakka, Mikael Petersen oqarpoq.

Mikael Petersenip naalakkersuisuuffii Jens Napaattuumit siorna januaarip qaammataani akisussaaffigineqalerput. Aningaasanik ilassinninnermi atugassarititaasunik sippuisimasutut nalilerneqarluni, Jens Napaattooq ukiup aappaata qeqqa naalakkersuisutut atareerluni aasaq manna tunuarpoq.

Simon Olsen naalakkersuisutut siorna novembarimi tunuarpoq, illuatungiliuttunit naalakkersuisooqataasalu IA-p kiisalu parteeqatiminit Siumumit kimigiiserfigineqarnermi kingorna.

Ukiuni arlaqartuni aalisarnermut pisortaqarfiup ESU-mit taarsigassarsisitsisarnermi Inatsisartut peqqusinerattut akiitsunik akiliisitsinngitsoortarnera Simon Olsenip tunuarneranut pissutaasut pingaarnersaraat. Taanna naalakkersuisutut taarserneqarpoq Rasmus Frederiksenimit, qaammatini qulingiluaannarni atareerluni ilassinnissutinik sippuilluni atuisimanini pissutigalugu ullumi tunuartariaqalersumit, naak pinaakkaluarluni.

Naalakkersuisut siulittaasuat Siumumeersoq Hans Enoksen politikkikkut isumaqatiginagu Namminersornermut Aatsitassaqarnermullu Naalakkersuisuusimasoq Siumumeersoq Jørgen Wæver Johansen upernaaq naalakkersuisutut tunuarpoq. Aalisarnermut Piniarnermullu naalakkersuisoqarfik kimut tunniunneqassanersoq suli ilisimaneqanngilaq, Hans Enoksenilli tigummigallassavaa, soorlu ineqarnermut attaveqarnermullu naalakkersuisoqarfik aamma tigummigallaraa.

Inatsisartut ukiaru ataatsimiilerpata naalakkersuisoqarfiit taakku inuttalerneqassapput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat