Naalakkersuisooqatigiinneq isasooriaannaavoq

- Nalunaarutip atorunnaarnissaa amerlanerussuteqartunit piumasarineqassappat, taava Naalakkersuisooqatigiinneq ingerlateqqissallugu tunngavissaaleqilissaagut.

Inatsisartuni ilaasortat partiinit assigiinngitsuneersut, tassa Lars-Emil Johansenip Siumumeersup, Jens B. Frederiksenip Demokratineersup aammalu Augusta Sallingip Atassummeersup, siunnersuutaat; avataasiorluni aalisarnermik nakkutilliineq pillugu nalunaarutip 2006-imeersup atorunnaarsinneqarnissaanik nutaamillu taarserneqarnissaanik imaqartoq, Inatsisartuni amerlanerussuteqartunit akuersissutigineqassappat, Inuit Ataqatigiit Naalakkersuisooqataasut taama erseritsigisumik piumasaqarput.

Inuit Ataqatigiit kiisalu attaviitsoq Esmer Bergstrøm siunnersuummut akerliupput. Siunnersuut akuerineqassappat nalaakkersuisooqatigiikkunnaarnissamik Inuit Ataqatigiit allaat siorasaaruteqarlutik.

Siumut Demokratillu siunnersuummut tapersersuipput, taavalu Atassutikkut iluminni avissaaqqallutik. Kattusseqatigiit imaaliinnarlugu akuersisinnaannginnerarput, taamaattumillu suliamut susassaqartut siunnersuutip aappassaannerneqannginerani tusarniarneqaqqaarnissaat innersuussutigalugu.

Tassa siunnersuutip taasissutigineqarnera Inuit Ataqatigiit naalakkersuisooqataanerannut aalajangiisuulluinnartussaassaaq.