Naalakkersuisooqatigiilivinneq sapaatip akunnerata tulliani aatsaat inissinneqassaaq

Naalakkersuisoqatigiinnissamik isumaqatigiinniarneq suli ingerlavoq. Naalakkersuisoqatigiinnissamullu isumaqatigiissut tunngaviusussaq ualimut piareerpoq, maannalu allaqqissaarneqarluni nutserneqarlunilu.
marsip 21-at 2013 18:03

 

Isumaqatigiinniarneq ullumi nuannersumik ingerlanneqarpoq.

-Suleqatigiippugut nuannersumik anersaarissimaarlutalu. Isumaqarpugut inuiaqatigiinnut tunngaviliisussat suleqatigiissutissagut ataatsimooruffigilluarlutigit tamannalu ersaattaappaluttarnitta takussutissaraa.

Isumaqatigiinniarnermi aquttuusoq Siumup siulittaasua, Aleqa Hammond ulloqeqqata kinguninngua taama oqarpoq.

Siunertaagaluarpoq naalakkersuisooqatigiilermi kingorna kikkut sumi naalakkersuisunngussanersut aqagu tallimanngornermi tamanut tusarliunneqarnissaa. Maannali nalunaarutigineqarpoq tamanna aatsaat sapaatip akunnerata tulliata aallartilaarnerani nalunaarutigineqarumaartoq.

Isumaqatigiinniarnerit taama sivisutigisumik ingerlanneqarnerannut isumaqatigiinniartut akornanni isumaqatigiittoqarsinnaannginnera tamassumunnga pissutaanngitsoq, Aleqa Hammondip oqaatigaa imalu nangilluni.

- Qulequttat tamaasa oqaluuserineqareerneranni itisiliisarpugut aamma piffissaqarluarluta naapeqatigiinnerput iluaraarput. Taamaattumik isumaqatigiippugut immitsinnut piffissaqartilluarniarluta, Aleqa Hammond oqarpoq.

Isumaqatigiinniarneq ima ingerlalluarpalutsigaaq allaat isumaqatigiinniartut ilaanni erinarsuutinik upernaarpalaartunik atuisarlutik.

Sapaatip akunnerata naanera isumaqatigiinniartunit atorneqarniarpoq, naalakkersuisooqatigiinnermik isumaqatigiissutip allaqqissaarnissaannut aamma nutserneqarnissaanut.

- Isumaqatigiinniartunit paasitinneqarnera naapertorlugu, isumaqatigiinniarnerit suli imgerlaqqikkallassapput. Tusaasinnaasasitut isumaqatigiinniarnerit nuannersumik ingerlanneqarput. Sulili isumaqatigiinniarnerit inissivinneqanngillat, taamaattorli naalakkersuisussatut kikkut inissinnissaat sukumiisumik oqaloqatigiissutigineqareerpat tamanna nalunaarutigineqarumaarpoq.

Siumup siunnersortaa, Julie Rademacher ualisoq taama oqarpoq.

Isumaqatigiinniarnermi politikkikkut oqariartuutit suut oqaloqatigiissutaasimanersut paasiniaagaluaratta tamanna pillugu oqaaseqarusuttoqanngilaq.