Naalakkersuisooqatigiilersussat nalunartoqaqaat

Inatsisartunut qinersineq ullaassaq nalunaaqutaq pingasunut qiteqqulluinnartoq, tassa 02.29, naammassisutut nalunaarutigineqarpoq.

Upernavimmi, pingaartumillu aamma Nuummi, inernernik kisitsiniarneq ajornartorsiutaangaatsiarmat, nuna tamakkerlugu inernerit nalunaarutiginissaat kinguartuungaatsiarpoq.

Demokraatit qinersinermi uani ajugaanerpaapput, inissanik tallimaniit arfineq’marlunnut siuariaramik.

Inatsisartunut qinersinermi siulittuutigineqarsimasut inissat qulit 2002-imi qinersinermi pissarsiarisatik Siumup partiiata pigiinnarpai, tassa siulittuutigineqarsimasut uniorluinnarlugit.

Qinersinermi uani ajorsarnerpaapput Inuit Ataqatigiit Atassullu, partiit taakku marluullutik inissat marluk, tassa tamarmik ataaseq, annaavaat. Kattusseqatigiit Partiiat allannguuteqarani ataatsimik ilaasortaatitaqaannarpoq.

Kikkut naalakkersuisooqatigiilissanersut ippassaq qinersinerup kingorna suli akineqarsinnaanngikkallarpoq.

Demokraatit inissat arfineq’marluk pivaat, aamma IA-p taamatut. Tamassumali taakku naalakkersuisooqatigiilernissaat ilimanarsisinngilaa, Atassutill arfinilinnik inissanik pissarsinermigut Demokraatit, IA-p partiillu nammineq naalakkersuisooqatigiilersissinnaavai – tassa Atassut oqanngippat Siumut naalakkersuisooqatigilissallugu.

Siumup partiiata inissat qulit 2002-imituulli tigummiinnarpai.