Naalakkersuinikkut sorsunnertiguunngitsorlu aaqqiisoqartariaqarpoq

Allattoq Jokum Nielsen
juulip 19-at 2006 16:47

Hizbollah-p Israel-ilimut saassussinerata takutippaa juutit naalagaaffiata illersornissamut iliuusissaasa apeqqusertariaqarnerat.

Hizbollah-p rakettii ungasinnerusumut igeriunneqarsinnaasut nakernerusullu Israel-imiunik tupaallatsitsisimaqaat, Israel-ilu siorasaarutit nutaat taakku akiornissaanut atortussakippoq. Israel kangia qiterlermi sakkutooqarnerpaavoq, silaannakkut sakkutuui pinerullugit taama oqartoqartarpoq. Hizbollah-lli sorsukkumatuuisa silaannakkut saassussinerminni tupatsitsillutillu qunulersitsipput. Israel-imiummi sakkutuui nuanninngitsumik paasisaqarput, qaartartunut ungasissumiit igeriuttakkanut illersuusiat nutaajunerpaat teknologikkullu siuarsimanerpaat Hizbollah-p rakettii takusinnaaneq ajorpaat. - Israel uupakaatitaavoq, Major Kenneth Pedersen Sakkutuut Ilinniarfianeersoq oqarpoq. - Ulloq unnuarlu nakkutilliissagunik sakkutuuminnik rakettinik igeriussisaqattaartut sanianiittoqartariaqassooq, peqquteqarluarlutillu taamaaliorsinnaanngillat. Hizbollah-naanngilarli sakkussanik periarfissarinnerusoq, Hamas Gaza-miit saniliminut Israelimut nammineq rakettiliaminik igeriussisarnerminik qunusitsivortaaq, Gaza-mi qullersuit napparutikuinik ruujorilioriarlutik qaartartunik immerlugit rakettiliortarput. - Hizbollah-p saassussinerata Israelip sanngiiffii ersersippai, Professor Gabriel Scheffer Jerusalem-imi Hebrew University-meersoq oqarpoq. Sakkutuut iliuusii rakettit Libanonimeersut Gazameersullu unitsikkallassagaluarunikkuluunniit, naggataatigut Israelip naalliuutigisussaassavaa, naalakkersuinikkut akersuunnermut aaqqiisoqanngippat, rakettinillu igeriussisaqattaarnerit unitsikkallarunnanngilaat.