Inatsisartunut aqagu qinersinissap inernissaa ippassaq immaqa aalajangipajaarneqarpoq, IA kamaqaluni politikkikkut aappakannaaminit Siumut-mit avissaarmat.
- Siumut suleqatissatut atorsinnaanngitsutut imminut inissippoq, IA-mit tusagassiutitigut nalunaarummi allassimavoq.
Partiit siulittaasuisa Radiokkut TV-kkullu ippassaq oqallinneranni IA-kkut Siumukkullu avissaarnerat ersarissivoq, IA-p siulittaasuata, aningaasaqarnermut naalakkersuisuugallartup, Josef Motzfeldt-ip Siumumik siunissami suleqateqaqqinnissani kissaatiginagu aammaarluni oqarmat, aamma naalakkersuiikkut nunatsinni mumittoqartariaqartoq ersarissisippaa, partiillu Siumup avataaniittut aqagu qinersisoqareerpat suleqatigiinnissamut qaaqquvaalusooq.
Partiit annerit pingasut, Siumut, IA Demokraatillu qinersinerup kingorna naalakkersuisooqatigiissinnaagunanngillat. Siumup IA-llu manna tikillugu naalakkersuisooqatiinnerigaluat ippassaq tassa ajalusoorpoq.
Illuatungaatigulli oqarsinnaavugut Demokraatit IA-kkunnut qineqqusaarnerup nalaani aappassiartaarinninniartut, taamaattoqassappallu oqarsinnaavuguttaaq Siumut oqaluttuarisaanermini aatsaavissuaq illuatungiuttunngussammat.
IA-p Siumumit avissaarnera kulturikkut illorsuarmi Katuami arfininngormat qineqqusaartoqarnerani pivoq. Inuit Ataqatigiit akuerisinnaanngilluinnarnerarpaat oqallinneq inoqatinut akerartuinertalik, politikkikkullu qunutitsiniarneq atorlugit Lars-Emil Johansenip ileqqulersornera. Lars-Emil Johansenip naggasiinermi oqaatsit atugai ataqqinassusiiaasut, Inatsisartut oqaluttarfianni atorneqarpata pinngitsooratik nipangersinneqartussat atorpai. Oqqakkut ajussuseq sakkugalugu qinersisartunik nikassaaneq Siumup takutitaa inuiaqatigiit atorfissaqartinngikkaat, IA allappoq.
Lars-Emil Johansen qineqqusaarnermi malunnarsaarpoq, oqarami, Siumumi aqutsisut ikiaroornartumik ajornartorsiuteqanngitsut.
Partiit siulittaasuisa KNR-TV-kkut ippassaq oqallinneranni, Anthon Frederiksen Kattusseqatigiit Partiianneersoq ilaatigut oqarpoq Siumut tassaasoq partii avissaartuuttoq.
Siumumi qineqqusaartup, Lars-Emil Johansen-ip, oqaatsimi taamarsuaq tiguneqarneri paasisinnaannginnerarpai.
- Atassutip qineqqusaartuisa ilaat qineqqusaarnermi tikkuaasimavoq, politikerit nuimanersaasa ilaat ikiaroornartumik hashimik pujortartartut. Uangalu erseqqissaatigiinnarpara, uagut partiitta tamanna ajornartorsiutiginngikkaa, Lars-Emil Johansen nutaarsiassaqartitsivimmut Ritzauimut oqarpoq.